35 jasqa deıingi jastarǵa bıyldan bastap 5 mln teńgege deıin mıkrokredıt beriledi

ASTANA. QazAqparat - Eńbek jáne halyqty áleýmettik qorǵaý mınıstrligi 2023 jylǵy 1 qańtardan bastap kúshine engen 2021-2025 jyldarǵa arnalǵan kásipkerlikti damytý jónindegi Ulttyq joba sheńberinde jastarǵa jeńildikpen mıkrokredıt berý qaǵıdasyn bekitti, dep habarlaıdy QazAqparat.

Qaǵıdada kásipkerlik qyzmetti bastaǵysy keletin nemese kásipkerlikpen aınalysatyn 21 jastan 35 jasqa deıingi jastar úshin konkýrstyq negizde mıkrokredıt berý kózdelgen.

Mıkrokredıt «Agrarlyq nesıe korporatsııasy» AQ arqyly beriledi. Nomınaldy syıaqy mólsherlemesi jyldyq 2,5%-dan aspaıdy.

Qaryzdyń eń joǵary somasy 5 mln teńgege deıin jáne ol úshin kepildiń bolýy mindetti.

Mıkrokredıtterdi kez kelgen maqsat úshin 5 jylǵa deıin, al mal sharýashylyǵyna 7 jylǵa deıingi merzimge alýǵa bolady.

Sondaı-aq negizgi bereshek pen syıaqyny óteý boıynsha jeńildik kezeńi kózdelgen, ol mıkrokredıtteý merzimi uzaqtyǵynyń 1/3 (úshten birinen) aspaıdy.

Qazirgi ýaqytta Eńbekmıni:

- jergilikti atqarýshy organdarmen kredıttik shart jasasý;

- «Agrarlyq kredıttik korporatsııa» AQ-men jergilikti atqarýshy organdardyń tapsyrma shartyn jasasý;

- bıznes-jobalardy qaraý boıynsha óńirlik komıssııalar qurý boıynsha jumys júrgizip jatyr.

Mıkrokredıt alýǵa ótinim qabyldaý ýaqyty jáne ótinish beretin keńselerdiń mekenjaıy týraly aqparat qosymsha habarlanady.