35 jasynda temirmen til tabysqan dánekerleýshi áıel
ATYRAÝ.KAZINFORM — «Ómir jolyńdy basqa arnaǵa buryp, neni qalaıtynyńdy túsinip, jańa mamandyqty ıgerý — eshqashan kesh emes». Bul 35 jasynda áke jolyn jalǵaýǵa bel býyp, qyz-kelinshekterge tańsyq jumysty meńgergen Meıramgúl Aıdaralıevanyń túıgeni.
8 jyl buryn jańa salaǵa aıaq basqan ol qazir temirdiń syldyry men elektr doǵasynyń jaryǵy úzilmeıtin Atyraý qalasyndaǵy vagon qurastyratyn zaýytta dánekerleýshi bolyp eńbek etedi. Jas mamandardy testileýden ótkizedi.
Meıramgúl Aıdaralıevanyń negizgi mamandyǵy — ustaz. Bul bala armany bolǵanmen túrli salada jumys istegen. 2018 jyly ákesi qaıtys bolǵannan keıin ómir arnasyn basqa baǵytqa betý burý týraly sheshim qabyldapty.
— Ákemniń kózi tirisinde paıdalanǵan qural-jabdyqtary men kerek-jaraqtaryna qarap turyp, «átteń, árkimniń qolyna ketedi-aý» degen oı sanama sap ete qaldy. Sol sátte boıymda senim paıda bolyp, jolyn jalǵaımyn degen sheshimge keldim, — deıdi dánekerleýshi Meıramgúl Aıdaralıeva.
3 aı arnaıy oqýdan ótip, Atyraýdaǵy túrli kompanııada jumys istegen. Reseıdegi zaýyttarda qyzmet etip, tájirıbe jınaqtaǵan.
43 jastaǵy kelinshek alǵashynda er adamdardyń tarapynan kúmán men senimsizdiktiń bolǵanyn jasyrmady.
— Dánekerleýshi bolyp alǵash ret kásiporynǵa jumysqa ornalasqan kezde bul istiń qyr-syryn úıretken áriptester boldy. Degenmen «asúıinde otyra bermediń be?» dep kúmán keltirgender de kezdeskeni jasyryn emes. Meni kóptiń oıy alańdatpady. Ákemniń atyn shyǵarýdy maqsat ettim. Jalpy men eki temirdi dánekerlep, qurastyrǵannan shabyt alamyn. Keıin ony zerthanaǵa jiberemiz.Qazir zaýytqa jumysqa kirýge kelgen jastardan test qabyldaımyn. «Men bıyl oqý bitirdim, qolym áli úırenbedi, kómektesip jiberesiz be?» degen jas órenderge úıretýden kúsh alamyn. Men kórsetip, jol siltegen jastardyń jumysqa ornalasýy maǵan qýanysh syılaıdy, jiger beredi, — deıdi dánekerleýshi áıel.
Ol úshin zaýyttaǵy jumys — tek jeke sheberlik emes, úlken komandanyń eńbegi. Vagon jasaý — bir adamnyń qolynan keletin is emes.
Tehnologtar jobasyn daıyndaıdy, qurastyrýshylar men montajdaýshylar bólshekterdi jınaıdy, tazalaý men tekserý jumystaryn atqaratyn óz mamandary bar. Al dánekerleýshiler sol eńbektiń mańyzdy kezeńderiniń birin oryndaıdy.
— Biz jumysta ballondardy da, temirlerdi de ózimiz tasımyz. Ballonnyń ózi kem degende 80 kılogramm bolady, ony arbaǵa salyp alyp júremiz. Apparattardy kóteremiz, symdaryn aýystyramyz. Mysaly, bir symnyń ózi shamamen 19 kılogramm tartady, — dep jumys barysyna toqtaldy keıipker.
Er adamdar basym óndiris alańynda Meıramgúl Aıdaralıeva ózin erkin ustaıdy. Temirdiń ortasynda júrse de, onyń bolmysynan náziktik pen tabandylyq qatar baıqalady.
Bir qaraǵanda aýyr óndiristiń ortasynda júrgen adamdy elestetý qıyn, biraq Meıramgúl bul salany tek mamandyq retinde emes, júrek qalaýymen tańdaǵan jan.
Óndiris alańynda ol — tájirıbeli maman, talapshyl ustaz. Jumysta temirden túıin túıgen Meıramgúl úıinde toqýmen aınalysyp, kıim tigedi.
— Jumysta men ózimdi áıel adam retinde sezinbeımin. Bul jerde men mamanmyn, dánekerleýshimin. Al úıde — anamyn, aıaýly jarmyn. Ómirlik serigimdi osy salaǵa kelgende kezdestirdim. Ol da dánekerleýshi. Tájrirıbesi menen kóp bolǵandyqtan bilgenin úıretip júredi. Ekeýmiz de osy zaýytta qyzmet etemiz. Alǵashynda qyzym mamandyǵya qyzyǵýshylyq tanytty. Keıin men qarsy boldym. Óıtkeni, óndiriste er adamdardyń arasynda jumys isteıtin áıel minezdi, batyl bolýy kerek. Bolmysyń men kásibıligiń arqyly ortada jumysyńdy kórsete bilý qajet, — deıdi Meıramgúl Aıdaralıeva.
Erlermen óndiriste ıyq tirestirip eńbek etip júrgen Meıramgúl Aıdaralıeva bolashaǵyn, aldaǵy ómirin osy mamandyqpen baılanystyrady.
El óndirisiniń órkendeýine úles qosý, qosqysy keledi, shákirt tárbıelep, eńbek naryǵyna kásibı mamandardy daıyndaý — dánekerleýshi áıeldiń alǵa qoıǵan maqsattarynyń biri.
Osyǵa deıin 30 jyldan astam ýaqyttan beri gúl satý bıznesimen aınalysatyn Baqyt Ishakova jylyjaıǵa qyzǵaldaqtyń 12 túrinen 200 myń túp ekkenin jazǵan edik.
