3,5 tonnadan asatyn júk tasymaldaryna qujattardy tsıfrlyq tirkeý mindetti bolady
ASTANA. KAZINFORM – Qazaqstanda 2026 jylǵy 1 maýsymnan bastap 3,5 tonnadan asatyn júk tasymaldary úshin jol paraqtary men taýar-kólik júkqujattaryn Kólik qujattaryn basqarýdyń biryńǵaı júıesinde (KQBBJ) mindetti tirkeý engiziledi.
Kólik mınıstrliginiń málimetinshe, bul talap aýyr júk tasymaldaıtyn avtokólik quraldaryn paıdalanatyn naryq qatysýshylaryna qatysty bolady.
– 3,5 tonnadan asatyn kólik quraldarymen júzege asyrylatyn barlyq tasymaldar boıynsha jol paraqtary men taýar-kólik júkqujattary KQBBJ júıesinde mindetti túrde tirkelýi tıis. Bul talap tasymaldaý úderisterin tsıfrlandyrýǵa jáne olardyń ashyqtyǵyn arttyrýǵa baǵyttalǵan, – delingen habarlamada.
Atalǵan norma Investıtsııalar jáne damý mınıstriniń 2015 jylǵy №546 buıryǵyna 2020 jyly engizilgen. Keıin júıeni jetildirý jáne bızneske beıimdeý maqsatynda ýaqytsha mindetti emes sıpatta qoldanylǵan.
– Qujattardy júıede tirkeý tasymaldaýdy resimdeýdi jeńildetýge, qaǵaz qujat aınalymyn qysqartýǵa jáne aqparatqa elektrondyq formatta qoljetimdilikti qamtamasyz etýge múmkindik beredi, – dep atap ótti vedomstvo.
Sonymen qatar qujattardy tirkemeý nemese jalǵan málimet engizý ákimshilik jaýapkershilikke ákeletini eskertildi. QR Ákimshilik quqyq buzýshylyq týraly kodeksiniń 571-1-babyna sáıkes qujattardy resimdemeý, tirkemeý nemese jalǵan derekter engizý úshin jaýapkershilik qarastyrylǵan.
KQBBJ júıesi - tasymaldaýshylar men memlekettik organdar arasynda qujattardy tirkeý, saqtaý jáne almasýdy qamtamasyz etetin tsıfrlyq platforma. Júıege tirkelý esutd.gov.kz portaly arqyly júzege asyrylady.
Aıta keteıik, ótken jyly el ishinde avtokólikpen 353 mln tonna júk tasymaldanǵan.
