3,5 tonnadan asatyn tasymal úshin qujattardy KQBBJ júıesinde mindetti tirkeý engiziledi
ASTANA. KAZINFORM – Kólik mınıstrligi 2026 jylǵy 1 maýsymnan bastap jol paraqtary men taýar-kólik júkqujattaryn mindetti túrde Kólik qujattaryn basqarýdyń biryńǵaı júıesinde (KQBBJ) tirkeý engiziletinin habarlady.
Bul talap salmaǵy 3,5 tonnadan asatyn avtokólik quraldarymen júk tasymaldaryn júzege asyratyn naryq qatysýshylaryna qoldanylady. Atalǵan sanattaǵy tasymaldar boıynsha barlyq jol paraǵy men taýar-kólik júkqujattary júıede tirkelýi tıis.
Atalǵan norma Qazaqstan Investıtsııalar jáne damý mınıstriniń 2015 jylǵy 30 sáýirdegi № 546 buıryǵyna 2020 jyly engizilgen. Keıinnen bızneske qolaıly jaǵdaı jasaý jáne júıeni tehnıkalyq turǵydan jetildirý maqsatynda ony qoldaný mindetti emes sıpatta boldy.
– Qujattardy júıede tirkeý tasymaldaýdy resimdeý úderisterin ońaılatýǵa, qaǵaz qujat aınalymyn azaıtýǵa jáne qujattarǵa elektrondyq formatta qoljetimdilikti qamtamasyz etýge baǵyttalǵan. Esterińizge sala ketemiz, qujattardy resimdemeý, olardy tirkemeý nemese jalǵan málimetter engizý úshin Qazaqstan Respýblıkasynyń Ákimshilik quqyq buzýshylyq týraly kodeksiniń 571-1-babynyń 1-tarmaǵyna sáıkes ákimshilik jaýapkershilik kózdelgen, - delingen habarlamada.
Aıta keteıik, KQBBJ — tasymaldaýshylar men memlekettik organdar arasynda kólik qujattaryn tirkeýge, saqtaýǵa jáne almasýǵa arnalǵan aqparattyq júıe. Tirkelý esutd.gov.kz portalynda qoljetimdi.
Qazaqstan men Vetnam «Orta dáliz» arqyly júk tasymalyn jedeldetpek.
