35 mln teńge qaıtaryldy: Qostanaı oblysynda jol jóndeý salasyndaǵy zańbuzýshylyqtar joıyldy
QOSTANAI. ASTANA — Beıimbet Maılın aýdanynyń prokýratýrasy júrgizgen taldaý aıasynda aýdandyq avtomobıl joldaryn jóndeý kezinde zańbuzýshylyqtar anyqtaldy. 1,9 mlrd teńge somasyna baǵalanǵan 8 jol ýchaskesi boıynsha jasalǵan sharttarda kepildik merzimderiniń bolmaǵany belgili boldy. Bul týraly Qostanaı oblysynyń prokýratýrasy málim etti.
Bul merdigerlerdiń oryndalǵan jumystardyń sapasyna jaýapkershiliktiń almaý qaýpin týyndatqan. Sonymen qatar, quny 720 mln teńge bolatyn jol ýchaskesin jóndeý merzimderin buzǵan merdigerge qatysty sharalar ýaqytyly qabyldanbaǵany anyqtaldy.
— Prokýrorlyq qadaǵalaý aktisi boıynsha anyqtalǵan zańbuzýshylyqtar joıyldy: memlekettik satyp alý sharttaryna qosymsha kelisimder jasalyp, úsh jyl merzimge kepildik mindettemeler engizildi, sondaı-aq bıýdjetke 35,6 mln teńge kóleminde aıyppul (turaqsyzdyq aıyby) qaıtaryldy, — delingen habarlamada.
Memlekettik satyp alýlar men jol jóndeý salasyna qadaǵalaý jalǵasady.
Eske sala keteıik, buǵan deıin Bas kólik prokýratýrasy Air Astana men Fly Arystan qyzmetin tekserýdi talap etken edi.
