35 myńǵa jýyq búldirshin elorda mektepteriniń tabaldyryǵyn attaıdy
ASTANA. KAZINFORM — Astanada 2026-2027 oqý jylyna birinshi synypqa qabyldaý naýqany jalǵasyp jatyr. Qujat qabyldaý 28 mamyrda bastalyp, 31 tamyzǵa deıin júrgiziledi, dep habarlaıdy elorda ákimdiginiń resmı saıty.
Astana qalasy Bilim basqarmasynyń málimetinshe, búginde 30 myńnan astam bala birinshi synypqa qabyldandy. Jańa oqý jyly bastalǵanǵa deıin elorda mektepteriniń tabaldyryǵyn 35 myńǵa jýyq búldirshin attaıdy dep josparlanyp otyr.
Ata-analar balasyn birinshi synypqa qabyldatý úshin qujattardy «elektrondyq úkimet» portaly — www.egov.kz arqyly elektrondy túrde tapsyra alady. Sonymen qatar qujattardy mektepke baryp, qaǵaz túrinde de ótkizýge múmkindik bar.
Birinshi synypqa qabyldaý úshin qajetti qujattar:
- ata-anasynyń nemese zańdy ókiliniń ótinishi;
- «Profılaktıkalyq ekpeler kartasy» (№ 065/ý);
- «Bala densaýlyǵynyń pasporty» (№ 052-2/ý);
- balanyń 3×4 sm ólshemindegi tsıfrlyq fotosýreti.
Qujattardy qaǵaz túrinde tapsyrǵan jaǵdaıda ata-anasynyń nemese zańdy ókiliniń jeke kýáliginiń kóshirmesi qosa usynylady.
Birinshi synypqa qabyldaý tártibi boıynsha tolyq aqparatty ata-analar turǵylyqty jeri boıynsha mektepterden nemese elektrondy portaldardan ala alady.
Jańa oqý jylyna daıyndyq aıasynda elorda mektepterinde birinshi synypqa baratyn balalardy qabyldaý jumysy belgilengen merzimge sáıkes júrgizilip jatyr.
Budan buryn bıyl 1-synypqa tapsyrylǵan qujattardyń 89 paıyzǵa jýyǵy elektrondy formatty berilgeni anyqtaldy.
