35 myń jas eńbek etti: «Jasyl el» maýsymy qorytyndylandy
ASTANA. KAZINFORM — Semeı qalasynda «Jasyl el» jastar eńbek jasaqtarynyń XXII maýsymynyń jabylýyna arnalǵan respýblıkalyq saltanatty jıyn ótti. Bul týraly Mádenıet jáne aqparat mınıstrligi málim etti.
Bıyl maýsymdyq jumyspen 35 myńnan astam jas qamtyldy. «Jasyl el» jasaqtary eldi mekenderdi abattandyrýǵa, ekologııalyq bastamalar men qoǵamdyq mańyzy bar jobalarǵa atsalysty.
Saltanatty jıynǵa elimizdiń barlyq óńirinen eńbek jasaqtarynyń ókilderi, memlekettik organdar, jastar jáne qoǵamdyq uıymdar, sondaı-aq Reseı Federatsııasynyń delegatsııasy qatysty.
Іs-sharada eńbek maýsymynyń qorytyndysy shyǵarylyp, úzdik jasaqtar men belsendi jastar marapattaldy. Sondaı-aq Qazaqstan men Reseıdiń jastar uıymdary tájirıbe almasty.
Qatysýshylar Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵyna da arnaıy bardy.
Baǵdarlama sońynda jastar «Taza Qazaqstan» jalpyulttyq aktsııasy aıasynda aǵash kóshetterin otyrǵyzdy.
Kóshetter respýblıkalyq «Táýelsizdik urpaqtary» grantynyń jeńimpazy Amına Baýyrjan ázirlegen EcoCocoon júıesi arqyly egildi. Bul júıe ósimdik tamyryna ylǵaldy birtindep jetkizip, ony syrtqy áserden qorǵaıdy ári onyń jaqsy ósýine jaǵdaı jasaıdy.
Aıta keteıik, «Jasyl el» jasaǵynda 14 jastan bastap jumys isteýge bolady.
