35-ke deıingilerdi jastar sanatyna jatqyzsaq, el jastarynyń sany 6 mln bolady - Darhan Qydyráli

TÚRKІSTAN. QazAqparat- Elimizde jastardyń jasy 29-dan 35-ke deıin ulǵaıýy múmkin. Bul týraly Aqparat jáne qoǵamdyq damý mınıstri Darhan Qydyráli Túrkistan oblysynyń turǵyndarymen kezdesýinde málimdedi, dep habarlaıdy QazAqparat tilshisi.

Eger zań jobasyn Májilis pen Senat maquldasa, jastardyń jasy 29-dan 35 jasqa deıin sozylady.

«Qazir elimizde 2,5 mln-ǵa jýyq jas bar. Eger zań qabyldansa, olardyń qatary 6 mln-ǵa deıin ósetin bolady. Bul jerde kóptegen adam memleket tarapynan jastarǵa beriletin múmkindikke ıe bolady»-dedi Darhan Qýandyquly.

Sondaı-aq, mınıstr aımaqtaǵy jumyssyz jastardy jumyspen qamtýǵa basymdyq beriletinin jetkizdi.

Aqparattyq salada, qoǵamdyq damý júıesinde jáne úkimettik emes uıymdarmen júrgiziletin jumystar boıynsha júzege asyp jatqan jumystar jóninde málimet berdi.

Turǵyndar tarapynan qoıylǵan suraqtarǵa jaýap berip, usynystaryn tyńdady.

Aıta keteıik, búgin Aqparat jáne qoǵamdyq damý mınıstri Darhan Qydyráli Túrkistan oblysyndaǵy BAQ basshylarymen kezdesýinde jýrnalısterge arnaıy mártebe beriletinin aıtqan bolatyn.