35 qazaqstandyq stýdent Qytaıdyń jetekshi ýnıversıtetinde bilim alyp júr
ASTANA. KAZINFORM — Qozybaev ýnıversıteti Qytaıdyń Soltústik-batys aýyl jáne orman sharýashylyǵy ýnıversıtetimen 10 jyldan beri tabysty yntymaqtastyq ornatyp keledi, dep habarlaıdy Ǵylym jáne joǵary bilim mınıstrliginiń baspasóz qyzmeti.
Osy ýaqyt ishinde akademııalyq almasý baǵdarlamasy aıasynda Qytaıdan 90 stýdent Qozybaev ýnıversıtetinde bilim alsa, ýnıversıtettiń 30 stýdenti Soltústik-batys aýyl jáne orman sharýashylyǵy ýnıversıtetinde oqydy.
Bıyl Qozybaev ýnıversıtetiniń 35 stýdenti Qytaı Halyq Respýblıkasyna akademııalyq saparmen bardy. Bul — Qytaıǵa uıymdastyrylǵan eń iri akademııalyq almasýlardyń biri. Bolashaq agronomdar men mal sharýashylyǵy salasynyń mamandary Qytaıdyń jetekshi agrarlyq joǵary oqý oryndarynyń birinde bilim alyp, zamanaýı zerthanalarda jumys isteýge jáne dalalyq zertteýlerge qatysýǵa múmkindik aldy.
— Qazir 33 bakalavr agronomııa, mal sharýashylyǵy óndirisiniń tehnologııasy, ósimdikter týraly ǵylym jáne tehnologııa baǵyttary boıynsha bilim alady. Sonymen qatar, osy oqý jylynan bastap eki magıstrant Soltústik-batys aýyl jáne orman sharýashylyǵy ýnıversıtetinde «Agronomııa» jáne «Mal sharýashylyǵy óndirisiniń tehnologııasy» bilim berý baǵdarlamalary boıynsha qos dıplomdy magıstratýrada oqýdy bastady. Olar alty aı Petropavl qalasynda bilim alyp, qalǵan 1,5 jylyn Qytaıda jalǵastyryp, ǵylymı-zertteý jumystaryn júrgizedi. Nátıjesinde túlekter qazaqstandyq jáne qytaılyq eki dıplomǵa ıe bolady, — delingen mınıstrlik taratqan aqparatta.
Soltústik-batys aýyl jáne orman sharýashylyǵy ýnıversıteti — Qytaıdaǵy jetekshi joǵary oqý oryndarynyń biri. Ýnıversıtet genetıka jáne daqyl selektsııasy, ósimdikterdi qorǵaý, aýyl sharýashylyǵy bıotehnologııasy, sý resýrstaryn basqarý jáne mal sharýashylyǵy baǵyttaryndaǵy iri ǵylymı-zertteý mektepterimen tanymal. Búginde bul oqý orny Qytaıdaǵy aýyl sharýashylyǵy ǵylymy salasyndaǵy eń iri ǵylymı-bilim berý ortalyqtarynyń biri bolyp sanalady.
Eki ýnıversıtet arasyndaǵy yntymaqtastyq uzaq merzimdi ári jan-jaqty sıpatqa ıe. Qazirgi ýaqytta atalǵan ýnıversıtette Qozybaev ýnıversıtetiniń Agrotehnologııalyq fakýltetiniń úsh jas oqytýshysy doktorantýrada (1-2 kýrs) bilim alyp jatyr. Sonymen qatar agronomııa jáne orman sharýashylyǵy kafedrasynyń eki oqytýshysy ǵylymı taǵylymdamadan ótedi.
Yntymaqtastyqtyń mańyzdy baǵyttarynyń biri — mamandardy tájirıbege baǵdarlaý. Jyl saıyn seriktestik aıasynda Soltústik-batys aýyl jáne orman sharýashylyǵy ýnıversıtetinde mal sharýashylyǵynyń zamanaýı tehnologııalary boıynsha trenıngter ótkiziledi. Bul oqytý sessııalaryna ýnıversıtet oqytýshylarymen qatar Soltústik Qazaqstan oblysy Aýyl sharýashylyǵy jáne jer qatynastary basqarmasynyń mamandary da qatysady.
Sáýir aıynyń sońynda Qozybaev ýnıversıtetine Qytaı ýnıversıtetiniń jeti stýdenti, al kúzgi semestrde taǵy shamamen 30 stýdenttiń akademııalyq almasý baǵdarlamasy aıasynda kelýi josparlanyp otyr.
Budan buryn Qytaı ýnıversıtetterine grantqa usynylǵan 102 qazaqstandyqtyń tizimi jarııalanǵany belgili boldy.