349 myńnan astam qazaqstandyq proaktıvti memlekettik qyzmetter týraly SMS habarlama aldy
ASTANA. KAZINFORM – Jyl basynan beri Otbasynyń tsıfrlyq kartasyn (OTsK) engizýdiń nátıjesinde áleýmettik-eńbek salasyndaǵy memlekettik qyzmetterdi proaktıvti formatta alý úshin 349,7 myń azamatqa SMS-habarlama jiberildi. Onyń ishinde 200 myńnan astam adam ótinish berýsiz járdemaqy nemese tólem alý múmkindigin paıdalanyp úlgerdi.
Eńbek jáne halyqty áleýmettik qorǵaý mınıstrliginiń dereginshe, OTsK memlekettik organdardyń qoldanystaǵy aqparattyq júıeleriniń derekteri negizinde qalyptastyrylady. Qazirgi ýaqytta onda 20,2 mln azamat nemese 6,2 mln-nan astam otbasy týraly aqparat jınaqtalǵan.
Jańa júıeniń basty maqsaty – qazaqstandyqtardyń memlekettik qoldaý júıesine teń qoljetimdiligin qamtamasyz etý. QR Áleýmettik kodeksinde OTsK áleýmettik saıasattyń orta jáne uzaq merzimdi mindetteri men baǵyttaryn aıqyndaıtyn qural retinde belgilengen.
- OTsK arqyly azamattar ótinish bermeı-aq járdemaqylar men áleýmettik tólemderdiń 11 túrin resimdeı alady. Olar: eńbek etý qabiletinen aıyrylǵan jaǵdaıda, jumyssyz qalǵan jaǵdaıda, asyraýshysynan aıyrylý boıynsha áleýmettik tólemder; bala týǵanda jáne bala bir jarym jasqa tolǵanǵa deıin kútimine baılanysty járdemaqylar; múgedektigi bar balany tárbıelep otyrǵan ata-anasyna járdemaqy; múgedektik boıynsha, kópbalaly otbasylarǵa, «Altyn alqa», «Kúmis alqamen» marapattalǵan analarǵa beriletin járdemaqylar; ataýly áleýmettik kómek jáne jerleýge arnalǵan tólem, - delingen aqparatta.
Sonymen qatar, OTsK arqyly zeınetaqy tólemderi, «qandas» mártebesiniń uzartylýy men aıaqtalý merzimi, jumyssyzdarǵa jumyspen qamtý sharalary týraly avtomatty habarlamalar da iske qosylǵan.
Memlekettik qoldaýǵa quqyq belgilengen jaǵdaıda áleýetti alýshylarǵa 1414 biryńǵaı baılanys ortalyǵynan SMS-habarlama joldanady. Azamat oǵan kelisimi týraly jaýap bergennen keıin ótinish avtomatty túrde resimdelip, járdemaqy nemese tólem taǵaıyndalady, qarajat bank shotyna aýdarylady.
Alaıaqtyq táýekelderiniń aldyn alý maqsatynda tek 1414 biryńǵaı baılanys ortalyǵynan keletin SMS-ke jaýap berý qajettigi eskertiledi. Barlyq suraqtar boıynsha 1414 nómiri arqyly Call-ortalyqqa habarlasýǵa bolady. Qońyraý shalý tegin.
Aıta keteıik, telefonǵa joldanǵan SMS áskerge shaqyrý týraly resmı habarlama retinde tanylady.