348 mlrd teńgege qarjylyq zań buzýshylyqtar anyqtaldy - QM
ASTANA. KAZINFORM — Bıyl 9 aıda 348 mlrd teńgege qarjylyq zań buzýshylyqtar anyqtaldy. Bul týraly búgin Úkimet otyrysynda Qarjy mınıstri Mádı Tákıev aıtty.
- Bıyldan bastap «Memlekettik satyp alý týraly» jańa zań qoldanysqa engizildi. Munda buryndary uzaq ýaqytqa sozylatyn satyp alý rásimderiniń merzimderin qysqartýǵa basymdyq berilgen. Búgingi kúni merzimder eń tómengi deńgeıge deıin qysqartylyp, otandyq taýar óndirýshilerdi qoldaýǵa baǵyttalǵan erejeler engizildi, - dedi ol.
Máselen, mınıstrdiń dereginshe, osy jyldyń 9 aıynyń qorytyndysynda ótken jyldyń osy kezeńimen salystyrǵanda:
- jasalǵan sharttar somasy men otandyq taýar óndirýshilerden satyp alý somasy 2 ese ósti;
- shaǵymdar sany 25 paıyzǵa qysqardy;
- jasalǵan sharttar sany 28 paıyzǵa, onyń ishinde otandyq taýar óndirýshilermen jasalǵan sharttar sany 30 paıyzǵa ósti.
- Búginde mınıstrlik memlekettik satyp alýda jasandy ıntellekt elementterin engizip jatyr. Máselen, konkýrstar reıtıngtik-baldyq júıeni paıdalana otyryp ótkiziledi Munda konkýrstyq komıssııa qurylmaıdy, jeńimpazdy tańdaý avtomatty túrde júzege asyrylady. Nátıjelerge shaǵym jasalmaıdy. Únemdelgen qarajat kólemi 781 mlrd teńge, - dedi mınıstr.
Mádı Tákıevtiń aıtýynsha, esepti kezeńde bıýdjet qarajaty men memleket aktıvterin tıimdi paıdalanýǵa baqylaýdy kúsheıtý aıasynda mynadaı sharalar atqaryldy:
- 2 trln teńgeden astam bıýdjet qarajaty boıynsha 791 tekserý júrgizildi;
- 348 mlrd teńgege qarjylyq buzýshylyqtar anyqtaldy, onyń 310 mlrd teńgege buzýshylyqtar joıyldy;
- áleýmettik salada 6 myńnan astam obekt onlaın monıtorıngpen qamtyldy.
- Naqty sektorda baqylaýdy kúsheıtý aıasynda kiristerdi jasyrýǵa jáne býhgalterlik derekterdi burmalaýǵa jol bermeý úshin táýekel beıinderi ázirlenip jatyr. Nátıjesinde 1,5 trln teńgege sapasyz josparlaý anyqtaldy, - dedi ol.
Aıta keteıik, Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqyǵa salyndy.