346 myń ózin-ózi jumyspen qamtyǵan azamat jáne 1,2 mln kásipker arnaıy rejımdi tańdady
ASTANA. KAZINFORM – Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken Salyq kodeksin engizý jónindegi jobalyq keńseniń jetinshi otyrysynda salyq rejımderin tańdaý boıynsha derekter jarııalandy. Kásipkerler 2026 jylǵy 1 naýryzǵa deıin salyq rejımin tańdaýǵa tıis bolatyn. Bul týraly Úkimettiń baspasóz qyzmeti habarlady.
Qarjy mınıstrliginiń málimetinshe, ózin-ózi jumyspen qamtyǵandarǵa arnalǵan rejımdi 346 myń adam tańdaǵan, onyń ishinde 265 myńy – kóleńkeli aınalymnan shyqqan jańa qatysýshylar.
Eske salsaq, salyq reformasynyń negizgi maqsatynyń biri – eńbek naryǵyn zańdastyrý jáne zańdy túrde jumys isteý úshin qarapaıym, túsinikti ári qoljetimdi jaǵdaı jasaý. Ózin-ózi jumyspen qamtyǵandarǵa arnalǵan arnaıy rejımniń basty artyqshylyǵy, tabysqa salyq salynbaıdy jáne jeke kásipker retinde tirkelý mindetti emes. Bul buryn tirkeýsiz jumys istegen azamattardyń zańdy túrde jumys isteýine múmkindik beredi.
Jeńildetilgen deklaratsııa negizindegi arnaıy rejımdi 1,2 mln kásipker tańdady.
Jalpyǵa ortaq paıdaly qazbalar boıynsha paıdaly qazbalardy óndirý salyǵy (PQÓS)
2026 jylǵy 1 qańtardan bastap, Bıýdjet kodeksiniń normalaryna sáıkes, jalpyǵa ortaq paıdaly qazbalar, jerasty sýlary jáne emdik balshyq boıynsha PQÓS túsimderi óndirý orny boıynsha jergilikti bıýdjetterge eseptelýi tıis.
Sonymen qatar Salyq kodeksiniń normalaryna sáıkes jalpyǵa ortaq paıdaly qazbalar, jerasty sýlary jáne emdik balshyq boıynsha PQÓS jer qoınaýyn paıdalanýshynyń ornalasqan jeri boıynsha tólenedi.
Bıýdjet jáne Salyq kodeksteriniń normalaryn úılestirý qajettiligine baılanysty tıisti ózgeristerdi Salyq kodeksine engizý týraly sheshim qabyldandy. Bul ózgerister qabyldanǵanǵa deıin 2025 jylǵy IV toqsan boıynsha túsimder jer qoınaýyn paıdalanýshy tirkelgen jerge (respýblıkalyq bıýdjetke) esepteledi. Al 2026 jylǵy mindettemelerden bastap, óndirý orny boıynsha (jergilikti bıýdjetke) baǵyttalady.
Korporatıvtik tabys salyǵy (KTS) jáne tabıǵı monopolııalar sýbektileriniń nysanaly qarajaty
Otyrysta tabıǵı monopolııalar sýbektileriniń nysanaly qarajatyna KTS salý máselesi de qaraldy.
Qoldanystaǵy zańnamaǵa sáıkes, tarıf quramyna engizilgen paıda men amortızatsııa nysanaly sıpatqa ıe jáne tek ınvestıtsııalyq baǵdarlamalardy iske asyrýǵa – ınfraqurylymdy salý, jańǵyrtý jáne qaıta qurýǵa baǵyttalady. Bul qarajat erkin paıda bolyp tabylmaıdy.
Energetıka jáne kommýnaldyq sektorlardy jańǵyrtý jónindegi ulttyq joba sheńberinde 2025–2029 jyldary jelilerdi jańartý boıynsha aýqymdy jobalar iske asyrylýda. Jańa obektiler paıdalanýǵa berilgen kezde negizgi quraldardyń quny men amortızatsııa kólemi artady. Bul óz kezeginde KTS boıynsha salyq bazasynyń ulǵaıýyna ákeledi.
Sonymen birge KTS tóleýge arnalǵan shyǵyndar tarıfte kózdelmegen jáne ótelmeıdi. Bul kásiporyndarǵa qosymsha qarjylyq júkteme túsirip, olardyń jańǵyrtý jobalaryna qatysýyn shekteýi múmkin.
Osyǵan baılanysty ınvestıtsııalyq baǵdarlamalardyń nysanaly qarajatyna KTS salýǵa jol bermeý jóninde biryńǵaı tásil qalyptastyryp, tıisti túsindirme berý usynyldy. Bul ınfraqurylymdy jańartýdy turaqty qarjylandyrýdy qamtamasyz etýge jáne tutynýshylarǵa túsetin júktemeniń ósýine jol bermeýge arnalǵan.
Sondaı-aq otyrysta taý-ken metallýrgııa salasy kásiporyndary men memlekettik mekemelerge salyq normalaryn qoldanýǵa qatysty máseleler qaraldy.
Buǵan deıin Premer-mınıstrdiń 1 mamyrǵa deıin jol boıyndaǵy servısti damytý kartasyn ázirleýdi tapsyrǵanyn habarlaǵanbyz.