340 mlrd aınalymǵa endi: Jyl sońyna deıin tsıfrlyq teńge 100 jobaǵa engiziledi
ASTANA. KAZINFORM — Tamyzda Qarjy mınıstrliginiń aqparattyq júıelerdi ıntegratsııalaý boıynsha barlyq tehnıkalyq jumysy aıaqtalady. Bul memlekettik satyp alý kezinde tsıfrlyq teńgeni paıdalanýǵa tolyq kóshýge múmkindik beredi, dep habarlaıdy Úkimettiń baspasóz qyzmeti.
Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótken Úkimettegi keńeste tsıfrlyq teńgeni engizýdiń pılottyq jobasyn júzege asyrýdyń aldyn ala qorytyndysy men ony synaqtan ótkizý barysynda týyndaıtyn máseleler qaraldy.
Qarjy mınıstrligi habarlaǵandaı, búgingi tańda tsıfrlyq teńge platformasynyń mártebesi jáne onyń jumys isteý tártibi zańnamalyq turǵydan bekitilgen. Aınalysqa 340 mlrd tsıfrlyq teńge shyǵarylǵan. Olardy paıdalana otyryp, 20 pılottyq joba júzege asyrylsa, taǵy 10-y júzege asyrylyp jatyr. Al 50-i iske qosýǵa daıyndyq ústinde.
— Pılottyq jobalar ınfraqurylymdyq qurylysty, bıýdjettik kredıtteý men sýbsıdııalaýdy, granttyq qarjylandyrýdy, memlekettik qoldaý sharalaryn, memlekettik satyp alýdy, salyqtyq ákimshilendirýdi, sondaı-aq Ulttyq bank pen kvazımemlekettik sektor sýbektileriniń satyp alýlaryn qamtıdy. Tsıfrlyq teńgeni mindetti túrde qoldaný quny 100 mln teńgeden asatyn jobalarǵa arnalǵan bıýdjettik shyǵystardyń segiz ereksheligi boıynsha qarastyrylady, — delingen habarlamada.
Tamyzda taýarlardy, dárilik zattardy, janar-jaǵarmaı materıaldary men basqa da materıaldyq qorlardy memlekettik satyp alý kezinde tsıfrlyq teńgeni paıdalaný josparlanyp otyr.
Keńeske qatysýshylar jobany odan ári keńeıtýdi tejeıtin máselelerge erekshe nazar aýdardy. Bas merdigerden bastap túpkilikti oryndaýshyǵa deıin bıýdjet qarajatyn paıdalanýdyń qadaǵalanýyn qamtamasyz etý negizgi máseleniń biri bolyp qala beredi. Іs júzinde qosalqy merdigerlik uıymdar kóbinese tsıfrlyq teńgeni paıdalaný úshin smart-kelisimsharttar jasasýǵa daıyn emes. Óıtkeni qoldanystaǵy zańnamada tıisti talaptar joq.
Bul kedergini joıý úshin Qarjy mınıstrligi qajetti quqyqtyq tetikti qurýdy kózdeıtin tıisti quqyqtyq aktilerge túzetýler paketin daıyndady.
Buǵan deıin agenttik tilshisi tsıfrlyq teńge qandaı aqsha ekenin, qalaı qoldanylatynyn jáne qandaı artyqshylyqtary bar ekenin zerdelep kórdi.
