340 mln teńge: Astanada balalarǵa «qaıyrymdylyq» jeleýimen kóshede aqsha jınatqan

ASTANA. KAZINFORM — Elordada jasóspirimderdi paıdalanyp, qoǵamdyq oryndarda zańsyz aqsha jınaý jaǵdaıy tirkeldi. 

Astana qalasynyń prokýratýrasy saıabaqtarda, oıyn-saýyq ortalyqtarynda, qoǵamdyq kólikterde jáne kóshelerde reıd júrgizdi.

— Barlyǵy 8 kámeletke tolmaǵan (2008–2010 jyldary týǵan) jasóspirim anyqtaldy. Olardy úsh qaıyrymdylyq qory eshqandaı shart jasamaı, volonter retinde tartqan (Ákimshilik quqyq buzýshylyq týraly kodekstiń 86-babynyń 3-bóligin buzý). Atalǵan qorlar «qaıyrymdylyq» degen jeleýmen shamamen 340 mln teńge qarjy jınaǵan, — degen aqparat aldyq.

Qazir atalǵan fakti boıynsha (Qylmystyq kodekstiń 190-baby 2-bóliginiń 1-tarmaǵy boıynsha) qylmystyq is qozǵaldy.

— Kámelet jasyna tolmaǵan balalardy zańsyz áreketke tartqany úshin qor basshylarynyń is-áreketine bólek quqyqtyq baǵa beriledi. Osy oraıda kámeletke tolmaǵandardy quqyq buzýshylyqqa tartý qylmystyq jaýapkershilikke ákeletinin túsindiremiz (Qylmystyq kodekstiń 132-baby). Odan bólek, Eńbek kodeksiniń 31-babynda kámeletke tolmaǵandarǵa erekshe eńbek sharttary qarastyrylǵan (16 jastan bastap eńbek sharty mindetti túrde jasalýy tıis, al 14 jastan bastap zańdy ókiliniń kelisimimen ǵana rásimdeledi), — delingen habarlamada.

Sondaı-aq qalalyq prokýratýra atalǵan talaptardy buzǵan jumys berýshiler Ákimshilik quqyq buzýshylyq týraly kodekstiń 86-baby boıynsha jaýapkershilikke tartylatynyn habarlap otyr.

— Qaıyrymdylyq qorlary men ata-analar balalardyń zańsyz áreketterge qatysýyna jol bermeý úshin olardyń jumysyna, sonyń ishinde volonterlik jáne basqa da is-sharalarǵa qatysqanda muqııat bolýǵa shaqyramyz, — dep eskertedi vedomstvo.

Eske sala ketsek, endi qaıyrymdylyq qorlary BAQ-ta esep jarııalaýǵa mindettelmek. 

Aıta keteıik, Mádenıet jáne aqparat mınıstri Aıda Balaeva qaıyrymdylyq kómek mehanızmin jetildirý qajettigin aıtqan edi.