340 mln teńge shyǵyn keltirgen — Shymkentte 235 adamdy san soqtyrǵandar sottaldy

ASTANA. QazAqparat - Shymkentte tanystary men týystaryn 340 mln teńgege san soqtyrǵan qylmystyq top sottaldy, – dep habarlaıdy Polisia.kz.

Shymkent polıtsııasyna uqsas mazmundy aryz-shaǵymmen 235 adam júgindi. Olar jalǵan tendrmen aınalysatyn alaıaqtardyń qurbany bolǵanyn aıtyp, tártip saqshylarynan kómek suraǵan. Jábirlenýshilerdiń sózinshe, óz tanystary «tendrmen aınalysatyn bastyǵyna» kómek qajettigin alǵa tartyp, nesıe rásimdeýge úgittegen. Jasaǵan jaqsylyǵy úshin tıesili úlesin berýge jáne bank aldyndaǵy qaryzdy tolyq óteýge ýáde etken. Kóbinese olar nesıeni taýarlaı rásimdetip, alynǵan qymbat tehnıkany qaıta satyp, shyqqan somanyń 10-12% paıyzyn syıaqy retinde berip otyrǵan. Alaıda, aı saıynǵy tólem ýaqyty kelgende, kúdiktiler qońyraýǵa jaýap bermeı, «izin sýytqan». Nátıjesinde nesıe ósimi kóbeıip, azamattar qaryzǵa belshesinen batqan.

11 adamnan turatyn qylmystyq toptyń qurbandary Túrkistan oblysynyń jáne Shymkent qalasynyń turǵyndary bolyp shyqty. Atalǵan jaıtty tergeýshiler QR QK-niń 190-baby (Alaıaqtyq) boıynsha tirkedi.Belgili bolǵandaı, alaıaqtar toby 23-43 jas aralyǵyndaǵy, 4 áıel jáne 7 er adamnan turǵan. Onyń ishinde eki bank menedjeri bar. Olardyń árqaısysynyń óz mindetteri bolǵan: keıbiri nesıe alatyn adamdardy tabýmen, taǵy ekeýi ony rásimdeýmen, qalǵandary satyp alynǵan taýarlardy alyp-satýmen aınalysqan.Keltirilgen jalpy shyǵyn kólemi 340 mln teńgege jýyq. Aryzdanýshylar ártúrli bankterden 250 myń teńgeden 6 mln teńgege deıin qaryz alǵan. Tártip saqshylary jınaqtalǵan is-qujattardy aıyptaý aktisimen sotqa joldady. Aıyptalýshylardyń árqaısysy jasaǵan qylmysy úshin 5 jylǵa deıin sottaldy.