34 jasar áıel mektepke 15 jasar oqýshy retinde baryp júrgen
ASTANA. QazAqparat - Amerıkandyq Longvıý qalasynyń (Tehas shtaty) Cherıtı Djonson esimdi 34 jasar azamatshasy birneshe aı boıy mektepke 15 jasar jasóspirim retinde baryp júrgen.
Jergilikti BAQ-tyń habarlaýynsha ótken jyldyń qazanynda Djonsondy qalalyq mektepterdiń birine Tamıkı Lınkoln atty jergilikti turǵyn ertip kelgen. Sol joly ol ózin mektep basshylyǵyna Cherıtı Stıvens dep tanystarǵan eken. Óziniń týǵan jyly retinde 1997 jyldyń qarashasyn ataǵan. Oqytýshylar aldynda Djonson buǵan deıin úıde bilim alǵanyn, sondyqtan buǵan deıingi úlgerimin, baǵalaryn kórsete almaıtyndyǵyn jetkizgen. Onyń senimdi jaýaptary mektep ákimshiliginiń kúdigin týdyrmaǵan eken. Djonson uzaq ýaqyt boıy Lınkolnniń úıinde turaqtaǵan. Bul áıelge Ch. Djonson óziniń jetim ekenin aıtyp, sendirgen. «Men ony aıap, baspana berdim. Oǵan qosa, kıimderin alyp berip turdym jáne ata-analar jınalysyna da qatystym»,-deıdi Lınkoln. Keıinnen bul áıel Djonsonnyń 15 jasta ekenine kúdiktenip, polıtsııa shaqyrǵan. Quqyq qorǵaý organdary ony jalǵan aqparat bergeni úshin qamaýǵa aldy. Ázirge, oǵan qatysty talap etiletin jaza jaıynda habarlanbaı otyr. 34 jasar áıeldiń bundaı qadamǵa nelikten barǵandyǵy belgisiz. «Ol ózin shynymen de 15-16 jastaǵy qyz sekildi ustandy. Sabaqty tyńǵylyqty tyńdap, úı tapsyrmalaryn oryndap júrdi»,-deıdi oqytýshylardyń biri.
