34 mln qaralym jınaǵan balet ártisi ónerge qalaı kelgenin aıtty
ASTANA. KAZINFORM – Astana opera teatrynyń jetekshi solısi Dııas Qurmanǵazynyń jattyǵý kezindegi vıdeosy áleýmettik jelide 34 mln-ǵa jýyq qaralym jınaǵan. Balet ártisi kútpegen tanymaldylyq, ónerge qalaı kelgeni jáne halyqaralyq sahnadaǵy armany týraly Jibek Joly telearnasyndaǵy «Búgin.LIVE» baǵdarlamasynda aıtyp berdi.
Dııas Qurmanǵazy Almatyda dúnıege kelgen. Baletke kelýdi bala kezinde josparlamaǵan. Ol kezde fýtbolmen aınalysyp júrgen jasóspirimdi mektepke kelgen horeografııa ýchılışesiniń mamandary baıqap, kásibı baǵytqa shaqyrǵan. Osylaısha 11 jasynda ýchılışege túsip, segiz jyl boıy ınternatta bilim alǵan.
– Ol kezde búkil oıym dop qýalap, fýtbol oınaý edi. Mektepke kásibı pedagogter kelip, balalardy tańdap, qabiletimizge qarap, ata-anamyzdyń nómirin alyp ketken. Keıin ata-anam «ýchılışege túsip kóresiń be?» dedi. Kelistim. Basynda bul salada qalamyn dep oılaǵan joqpyn. Tipti besinshi synypta ákeme «bul jerde oqyǵym kelmeıdi» dedim. Biraq ákem sońyna deıin oqyp shyǵatynymdy aıtty. Sóıtip segiz jyl oqyp, ýchılışeni bitirdim, – dedi Dııas Qurmanǵazy.
Qazir balet ártisiniń kúndelikti ómiri qatań tártipke qurylǵan. Tańerteńgi daıyndyqtan keshki repetıtsııaǵa deıingi ýaqyttyń basym bóligi zalda ótedi.
Jaqynda Dııastyń jattyǵý kezinde oryndaǵan kúrdeli elementteri túsirilgen vıdeo áleýmettik jelide kútpegen jerden keńinen taraǵan.
– Bul vıdeony túsirýdiń óz tarıhy bar. Basynda keıbir elementter durys shyqpaı qaldy. Sondyqtan sońyna deıin qalyp, bárin durystap qaıtalap, dosymnan vıdeoǵa túsirip berýin suradym. Іshindegi elementter qıyn. Olardy kúndelikti jattyǵý arqyly birneshe jylda qalyptastyratyn tehnıka deýge bolady. Men sol sátte ózim úshin túsirip, keıin demalyp otyrǵan kezde Instagram-ǵa sala saldym. Repetıtsııadan keıin telefonymdy ashsam, qaralymdar birden kóbeıip ketipti. Bir saǵattyń ishinde 200 myń qaralym bolǵan. Keıin áriptesterim de júgirip kelip, vıdeony bári kórip jatqanyn aıtty. Qazir ol 34 mıllıonǵa jýyq qaralym jınady. Pikir qaldyrǵandardyń arasynda AQSh, Meksıka, Japonııa, Ońtústik Koreıa sııaqty elderdiń turǵyndary kóp boldy, – dedi ol.
Ónerpaz áleýmettik jelini ózin tanytý úshin júrgizetinin aıtty. Onyń basty maqsatynyń biri – halyqaralyq sahnaǵa shyǵyp, álemniń tanymal teatrlarynda shaqyrylǵan ártis retinde óner kórsetý.
Dııas úshin ár róldiń óz orny bar. Ótken maýsymda ol Marıýs Petıpanyń áıgili «Baıaderka» baletinde Solor rólin somdaǵan. Bul róldi ol bala kezinen armandaǵan. Al aldaǵy qoıylymdardyń qatarynda «Romeo men Djýletta» baleti bar. Ónerpaz onda Romeonyń rólin somdaıdy. Sonymen qatar «Spartak» baletinde Spartaktyń ózin nemese Krasstyń rólin oryndaýdy armandaıdy.
– Óz teatrymnan basqa teatrda turaqty ártis bolǵym kelmeıdi. Biraq shetelde shaqyrylǵan ártis retinde óner kórsetkim keledi. Parıjdegi úlken sahnalarda, Royal Ballet sekildi álemge tanymal teatrlarda gastrolmen óner kórsetý armanym. Kishkentaı kezimde «Baıaderkany» bir ret kórip, úlken ártisterge qarap osy róldi oınasam dep armandaıtynmyn. Onyń tehnıkasy óte kúrdeli, dýetteri de qıyn. Múmkin shyǵysqa jaqyn bolǵandyqtan shyǵar, bul ról ózime erekshe jaqyn boldy, – dedi balet ártisi.
Ónerpaz baletke qyzyǵatyn balalardy erte jastan daıyndaý kerek dep esepteıdi. Onyń aıtýynsha, 7-8 jastan bastap jattyǵý balanyń denesin qajetti tehnıkaǵa beıimdeýge múmkindik beredi. Sonymen qatar ul balalardyń baletke barýyna qatysty qalyptasqan taptaýrynnyń da joıylǵanyn qalaıdy.
Aldaǵy kúzdiń sońyna qaraı Astana opera teatrynyń sahnasynda «Charlı» baleti qoıylady. Sonymen qatar jas horeograf Ǵumar Sultanbekov daıyndap jatqan otandyq «Tomırıs» baletinde Dııas Qurmanǵazy óner kórsetedi.
Aıta keteıik, buǵan deıin, Shymkentte Mádenıet jáne óner ýnıversıteti qurylyp, jańa Opera jáne balet teatry salynatynyn jazǵan edik.
