34 keli marıhýana, 2 keli gashısh — Elordada iri kólemde esirtki jetkizýshi ustaldy

ASTANA. KAZINFORM - Astanada Aqmola oblysynyń aýmaǵyna iri kólemde esirtki jetkizýshi er adam qolǵa tústi. Odan 34 kelige jýyq marıhýana, 2 keliden astam gashısh tárkilendi, dep habarlaıdy QR ІІM baspasóz qyzmeti. 

Tártip saqshylary júrgizgen jedel-izdestirý is-sharalarynyń nátıjesinde Aqmola oblysynyń aýmaǵyna iri kólemde esirtki jetkizýshiniń joly kesildi.

Aqmolalyq jedel ýákilder elordada zańsyz aınalymnan 34 kelige jýyq marıhýana tárkiledi. Bul — qara naryqtaǵy quny 34 mln teńgeni quraıtyn 7 myńǵa jýyq dozaǵa teń.

Sonymen qatar quny 5 mln teńge bolatyn 500-den astam dozaǵa teń 2 keliden astam gashısh tabyldy.

54 jastaǵy er adam esirtkini tek óziniń úıinde ǵana emes, jalǵa alynǵan jertólede de saqtaǵan. Munda polıtsııa qyzmetkerleri esirtki zattaryn oraýǵa arnalǵan qurylǵylardy tárkiledi.

Osy derek boıynsha sotqa deıingi tergeý júrgizilip jatyr. Kúdikti qamaýǵa alyndy.