34 qazaqstandyq Irannan Armenııaǵa evakýatsııalandy
ASTANA. KAZINFORM — Irannan Armenııaǵa 34 Qazaqstan azamaty evakýatsııalandy, dep habarlaıdy Kazinform agenttiginiń Erevandaǵy menshikti tilshisi.
Qazaqstannyń Armenııadaǵy Elshiliginiń qoldaýymen Irannan «Agarak» armıan baqylaý-ótkizý pýnkti arqyly «Zarkýh» altyn óndirý kásipornynyń 34 qyzmetkeri evakýatsııalandy. Qazaqstan azamattary avtobýspen uıymdasqan túrde Erevan qalasyna jetkizilip, kelgennen keıin qonaqúıge ornalastyryldy.
Otandastarymyzdyń Erevannan Almatyǵa ushýy 5 naýryzǵa josparlanǵan. Ushý Máskeý arqyly tranzıtpen júzege asyrylady.
«Zarkýh» kásipornynyń IT-bóliminiń jetekshisi Andreı Sýharevtiń aıtýynsha, Irandaǵy jaǵdaıdyń ýshyǵýyna baılanysty kompanııa basshylyǵy evakýatsııa týraly sheshimdi dereý qabyldaǵan.
— Iranda áskerı qımyldar bastalǵan sátten bastap basshylyq Qazaqstan azamattaryn elge qaıtarý týraly jedel sheshim qabyldady. Tıisti tizimder Armenııadaǵy Qazaqstan Elshiligine joldandy. Elshilik jergilikti bılikpen birlesip, Iran–Armenııa shekarasynda «jasyl dálizdiń» uıymdastyrylýyn qamtamasyz etti. Jaǵdaı turaqtanyp, jumysymyzdy jalǵastyrýǵa múmkindik týady dep úmittenemiz. Elshilik qyzmetkerlerine jedel kómegi úshin alǵys bildiremiz, — dedi ol.
Buǵan deıin Qazaqstan Taıaý Shyǵys elderinen basqa memleketterdiń azamattaryn evakýatsııalaýdy uıymdastyrý múmkindigin qarastyrýǵa daıyn ekeni habarlanǵan bolatyn.