34 adam men 20 kólik qar qursaýynan shyǵaryldy - Almaty oblysy
ASTANA. Qańtardyń 19-y. QazAqparat - Ótken dúısenbi, qańtardyń 18-i kúni Almaty oblysynda qutqarýshylar qar qursaýynan 34 adam men 20-ǵa jýyq avtokólikti shyǵardy,
habarlaıdy QR TJM-nyń baspasóz qyzmeti.
Máselen, Saryózek-Qorǵas avtojoly boıyndaǵy «Altynemel» asýynda 07 saǵat 35 mınýtta qar qursaýynda tórt avtokólik qalyp qoıǵan, onyń ishinde eki jedel medıtsınalyq járdem mashınasy men 9 adam bar. Qutqarý jumystarynan keıin barlyq tehnıkalar men adamdar din aman Saryózek qalasyna qaraı bet aldy.
Sondaı-aq Almaty-Kegen-Narynkól tas joly boıyndaǵy «Kegen» asýy aýmaǵynda qar astynda qalǵan 19 jolaýshysy bar taǵy jeti mashına qutqarylyp, keıin olar óz kúshterimen Kegen aýylyna qaraı qozǵalystaryn jalǵastyrǵan.
Sonymen birge, «Peresheıka» jáne «Qarkól» ýchaskeleri arasyndaǵy kúre jolda qalyp qoıǵan 6 adam qutqaryldy. Bul aýmaqta qutqarý jumystary qańtardyń 17-si kúni keshke bastalǵan bolatyn. Sol ýaqytta qar qursaýynan 9 birlik tehnıka men 18 adam shyǵaryldy. Dúısenbi kúni taǵy bir jeńil avtokólik pen alty adam tabyldy.
Vedomstvodan málim etkendeı, qańtardyń 18-i saǵat 12.00-degi jaǵdaı boıynsha barlyq qutqarý jumystary tolyǵymen aıaqtaldy.
