33 mln adam qol qoıdy: «Real» jankúıerleri Mbappeni komandadan shyǵarý úshin petıtsııa jarııalady
ASTANA. KAZINFORM — Kılıan Mbappeni Real Madrıdten shyǵarýdy talap etken petıtsııa 33 mıllıon qol jınady, dep habarlaıdy Al Jazeera.
Janjal shabýylshy jambas jaraqatynan aıyǵýy kerek bolǵan kezde, ıspandyq aktrısa Ester Ekspozıtomen birge Sardınııadaǵy ıahtada sýretke túskennen keıin týdy.
Jankúıerler muny klýbqa qurmetsizdik retinde qabyldady. Sebebi Mbappeniń qazirgi jaraqaty jeksenbi kúni «Barselonaǵa» qarsy El-Klasıkoda oınaýǵa kedergi keltirýi múmkin. Syn kúsheıgennen keıin Eksposıto Instagram-daǵy pikir jazý múmkindigin óshirdi, alaıda oqyrmandar onyń burynǵy jazbalaryna nazar aýdara bastady.
«Mbappe Out» atty petıtsııa bastapqyda 200 000 qol jınaýdy maqsat etken, biraq birneshe kún ishinde bul kórsetkishti 165 esege artty. Kórsetkishtiń shynaıylyǵyn tekserý múmkin emes, sebebi saıt elektrondyq poshta nemese jeke derekterdi talap etpeıdi.
Aıta keterligi, qol qoıý sany Frantsııa halqynyń jartysyna jýyq jáne aldaǵy álem chempıonatyna qatysatyn kóptegen elderdiń halqy sanynan da kóp.
Degenmen, bul petıtsııa naqty saldarǵa ákelmeıdi. Mbappe «Real Madrıd» klýbymen 2029 jylǵa deıin kelisimshartqa otyrǵan jáne qazir komandamen birge jattyǵyp jatyr. Bas bapker Alvaro Arbeloa oıynshyny qorǵap, jaraqatty emdeý medıtsınalyq shtab baqylaýynda ekenin, al bos ýaqytta oıynshy óz qalaýynsha áreket ete alatynyn aıtty.
2026 jylǵy álem chempıonatyna deıin Mbappe tolyq saýyǵýy kerek. Frantsııa quramasy týrnırdi Senegalǵa qarsy matchpen bastaıdy, odan keıin Irak jáne Norvegııamen oınaıdy. Sondaı-aq olar Kot-d’Ivýar jáne Soltústik Irlandııaǵa qarsy joldastyq kezdesýler ótkizedi.
Aıta keteıik, Kılıan Mbappe buǵan deıin PSJ-men sottasyp, nátıjesinde jeńiske jetti. Eńbek sotynyń sheshimine sáıkes, fýtbol klýby tez arada burynǵy oıynshysyna 61 mıllıon eýro tóleýi kerek bolatyn.
