338 adam «Bolashaq» halyqaralyq stıpendııasynyń ıegeri atandy

ASTANA. QazAqparat - Qazaqstan Respýblıkasynyń Memlekettik hatshysy Ádilbek Jaqsybekovtiń tóraǵalyq etýimen Shetelde kadrlar daıarlaý jónindegi respýblıkalyq komıssııanyń otyrysy ótti.

Bul týraly Aqordanyń baspasóz qyzmeti habarlaıdy. Otyrysta Respýblıkalyq komıssııa tapsyrmalaryn oryndaý, «Bolashaq» halyqaralyq stıpendııasyn taǵaıyndaý jáne odan aıyrý máseleleri talqylanyp, azamattardyń ótinishteri qaraldy.

Atap aıtqanda tildik kýrstardy jańa úlgi boıynsha iske asyrý tujyrymdamasynyń jobasy qaraldy. Stıpendıattardy tildik daıarlaýdy árbiriniń uzaqtyǵy 3 aıdan 6 aıǵa deıin bolatyn eki kezeńde júrgizý qarastyrylýda.

Tildik daıarlaýdyń uıymdastyrý-tehnıkalyq jáne oqý-ádistemelik máselelerin sheshý úshin sheteldik seriktes retinde Brıtandyq Keńes tartylatyn bolady.

Respýblıkalyq komıssııa otyrysynyń qorytyndysy boıynsha hattamalyq sheshimder qabyldandy. 338 adam «Bolashaq» halyqaralyq stıpendııasynyń ıegeri atandy.