334 mln teńgelik alaıaqtyq: Tarazda avtosalon menedjeri 8 jylǵa sottaldy
ASTANA. KAZINFORM — Tarazda avtosalonnyń burynǵy menedjeri iri kólemdegi alaıaqtyq úshin sottaldy, dep habarlaıdy Bas prokýratýranyń baspasóz qyzmeti.
Qalanyń 25 jastaǵy turǵyny avtosalonda satý bóliminiń basshysy bolyp jumys istep júrip, klıentter men jumys berýshisin aldaǵan. Tergeý derekterine sáıkes, ol klıent áıelge quny 90 mln teńge turatyn kóligin jańasyna aýystyryp berýge ýáde etip, avtokólikti satyp jiberip, qarajatty óz paıdasyna jumsaǵan. Keıin bul áreketin jasyrý úshin basshylyqtyń ruqsatynsyz avtosalonǵa tıesili 83 mln teńgelik jańa kólikti klıentke bergen.
Budan bólek, aıyptalýshy satýǵa qaldyrylǵan quny 68 mln jáne 34 mln teńge bolatyn avtokólikterdi satyp, aqshasyn ıemdengen. Sondaı-aq, avtosalon menshigindegi quny 59 mln teńge turatyn jańa Toyota Land Cruiser kóligin tómen baǵamen ótkizip jibergen.
— Sot ony asa iri mólsherde alaıaqtyq jáne senip tapsyrylǵan bóten múlikti ıemdený baptary boıynsha kináli dep tanydy. Alǵashqy úkimmen oǵan 5 jyl 1 aı bas bostandyǵynan aıyrý jazasy taǵaıyndalǵan. Bul rette sot onyń jasyn jáne kinásin ishinara moıyndaýyn jeńildetetin mán-jaı retinde eskergen. Alaıda prokýrordyń narazylyǵy negizinde kassatsııalyq sot isti qaıta qarap, jaza merzimin 8 jylǵa deıin ulǵaıtty. Sebebi keltirilgen materıaldyq shyǵyn ótelmegen, — delingen habarlamada.
Mamandar azamattarǵa kólik satyp alý kezinde saq bolýǵa keńes beredi. Atap aıtqanda, kelisimshart talaptaryn muqııat tekserip, qujattardaǵy mórlerdiń sáıkestigine kóz jetkizý jáne tólemniń tikeleı kompanııanyń resmı shotyna túskenin baqylaý qajet.
Budan buryn Almaty oblysynda avtosalonnan kólik urlaǵan qylmystyq top ustalǵanyn jazǵanbyz.
