3316 sheteldik zańsyz jumys istegen - QR ІІM
NUR-SULTAN. QazAqparat – Jyl basynan beri kóshi-qon zańnamasyn buzýdyń 13,5 myń faktisi tirkelgen, dep habarlaıdy QazAqparat tilshisi.
Іshki ister mınıstrliginiń resmı ókili Nurdildá Oraz vedomstvonyń kezekti onlaın brıfınginde «Mıgrant» jedel is-sharasynyń qorytyndysyn jarııalady.
«7-16 maýsym aralyǵynda ІІM ótkizetin «Mıgrant» jedel is-sharasy aıaqtaldy. Pandemııaǵa baılanysty myńdaǵan sheteldikter Qazaqstan aýmaǵynda qalyp, elde shyǵa almaǵan edi. Іshki ister mınıstrliginiń kóshi-qon qyzmeti bul adamdarǵa qujattaryn rásimdegýe kómektesti. Jyl basynan beri polıtsııa qyzmetkerleri 5 myńnan astam mıgrantqa, tólqujattarynyń merzimi ótken 956 sheteldikke elden shyǵýǵa kómektesti», - dedi mınıstrlik ókili.
Onyń aıtýynsha, kóshi-qon zańnamasyn qasaqana buzatyn adamdardy anyqtaý úshin polıtsııa qyzmetkerleri shetel azamattary toptasyp turatyn jerlerge tekserister júrgizgen.
«Shetel azamattarynyń jaldamaly eńbegin zańsyz paıdalanatyndardyń turǵyn úı sektoryna, qurylys nysandaryna, bazalarǵa, uıymdar men zańdy tulǵalardyń mekenjaıyna reıdter uıymdastyrylyp, avtokólikter tekserildi. Operatsııa júrgizý kezinde kóshi-qon zańnamasyn buzǵan 13,5 myń fakti anyqtaldy. Onyń ishinde sheteldikterdiń elde bolý merzimin buzýmen baılanysty 10 myń fakti, elimizde zańsyz eńbek etip júrgen sheteldikter boıynsha shamamen 3316 fakti tirkeldi. Sheteldik jumys kúshin zańsyz paıdalanǵany úshin 702 jumys berýshige ákimshilik jaza taǵaıyndaldy», - dedi resmı ókil.
Nurdildá Oraz sheteldik azamattardy aýyr jumyspen birge tilenshilikke tartý da jıi kezdesetinin aıtty.
«Elge kelgen sheteldikterdi ishki ister organdaryna ýaqtyly habarlamaǵany úshin 5 myńnan astam jeke jáne zańdy tulǵalarǵa shara qoldanyldy. Qaıyrshylyqpen aınalysqan 62 sheteldik jaýapkershilikke tartyldy. Mysaly, Shymkent qalasynda 2 zańdy tulǵanyń aýmaǵynda ruqsat qujattarynsyz eńbek etip júrgen 34 sheteldik anyqtaldy. Semeı qalasyndaǵy kópqabatty turǵyn úıdiń qurylysynda qujatsyz jumys istep júrgen 16 sheteldik belgili boldy», - dedi ІІM resmı ókili.
