33 jyl buryn eki áıeldi óltirgen qaraǵandylyq sottaldy
QARAǴANDY. QazAqparat - 33 jyl buryn eki áıeldi óltirgen Qaraǵandy turǵyny Konstantın Hýrtsııa 10 jylǵa bas bostandyǵynan aıyryldy, dep habarlaıdy «QazAqparat» HAA tilshisi.
«Hýrtsııa Konstantın Platonovıch aıypty dep tanylyp, 10 jylǵa bas bostandyǵynan aıyrý jazasy taǵaıyndalsyn», - dedi sottyń úkimin oqyǵan Qaraǵandy oblystyq qylmystyq ister boıynsha mamandandyrylǵan aýdanaralyq sotynyń sýdıasy Islamhan Esenbaev.
1984 jyldyń besinshi shildesinde sol kezde 23 jasta bolǵan K.Hýrtsııa tanys áıeldiń úıine qonaqqa barǵan. Úıde 23 jastaǵy ózge qonaqpen janjaldasyp, ony óltirgen. Keıin jatyn bólmege kirip, uıyqtap jatqan páter ıesin de óltiredi. Onyń uıyqtap jatqan eki jasar ulyna tıispegen. QazKSR ІІM qyzmetkerleri oqıǵa ornynan 11 saýsaq izin taýyp, onyń toǵyzynyń kimge tıesili ekendigin anyqtaǵan. Qalǵan ekeýiniń kimdiki ekeni belgisiz.
56 jastaǵy qylmyskerdi polıtsııa bıyl qyrkúıekte ustaıdy. Ol usaq buzýshylyq úshin ustalyp, saýsaq izin tapsyrady. Onyń saýsaq izderi 33 jyl buryn oqıǵa ornynan alynǵan saýsaq izderimen tolyqtaı saı keledi.
K.Hýrtsııa sotta ártúrli jaǵdaımen týǵan eki ulynyń qaıtys bolǵanyn aıtty. Muny eki áıeldi óltirgeni úshin taǵdyrdyń jazasy dep esepteıdi. Sotqa óltirilgen áıelderdiń biriniń uly qatysty. Ol sol kezde eki jasta bolǵan, qaıǵyly oqıǵanyń mán-jaıy onyń esinde joq.
