33 júk kóliginiń bastapqy tirkeýden zańsyz ótýine baılanysty HQKO-nyń burynǵy basshysy ustaldy

ASTANA. KAZINFORM - Qarjylyq monıtorıng agenttigi Qaraǵandy oblysynda bir top adamnyń júk kólikterin zańsyz bastapqy tirkeýge alǵanyn anyqtady, dep habarlaıdy agenttiktiń baspasóz qyzmeti.

Baspasóz qyzmetiniń habarlaýynsha, Halyqqa qyzmet kórsetý ortalyǵynyń (HQKO) qyzmetkerleri kólikterdiń bastapqy tirkeý alymy men ýtılızatsııalyq alymdy tóleýden bosatý maqsatynda ıntegratsııalanǵan aqparattyq júıege júk kólik quraldarynyń VIN-kodtary boıynsha kórineý jalǵan derekterdi engizgeni anyqtaldy.

Osylaısha, olar 33 júk kóligin zańsyz bastapqy tirkeýden ótkizgen. Sonyń saldarynan jergilikti bıýdjetke 315 mln teńgeden astam somaǵa tólemder túspegen.

Kúdiktiler-mamandandyrylǵan HQKO-nyń burynǵy basshysy jáne HQKO basshysynyń orynbasary ustaldy, sot «qamaýda ustaý» túrindegi bultartpaý sharasyna sanktsııa berdi.

Kúdiktilerdiń múlkine 42 mln teńge kóleminde tyıym salyndy.

Qazirgi ýaqytta sotqa deıingi tergeý júrgizilýde.

QR QPK-niń 201-baby tártibindegi ózge de aqparat jarııa etýge jatpaıdy.

QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.

Esterińizge sala keteıik, bıyl Aqmola, Qostanaı, Almaty, Pavlodar oblystarynda alymdardy tólemeı jalǵan tólem qujattary boıynsha kólik quraldaryn jappaı bastapqy tirkeý faktileri anyqtaldy.

Sonymen qatar, Agenttik elimizdiń barlyq Arnaıy HQKO-larynda alymdardy durys tóleý maqsatynda tartqyshtardy, avtobýstardy jáne basqa da kólikterdi esepke qoıý zańdylyǵyna keń aýqymdy tekserýler júrgizdi.