33 jastaǵy áıel er azamatty aıaýsyz óltirdi degen kúdikpen ustaldy
TALDYQORǴAN.QazAqparat - Almaty oblysynda 33 jastaǵy áıel azamattyq nekedegi joldasyn óltirdi degen kúdikpen ustalyp, qamaýǵa alyndy, dep habarlaıdy QazAqparat tilshisi.
Oqıǵa Talǵar aýdanynda bolǵan. 20 jeltoqsan kúni Týǵanbaı aýylynyń mańyndaǵy vagondardyń birinen er adamnyń múrdesi tabylǵan. Mert bolǵan 47 jastaǵy er azamat pyshaq jaraqatyn alǵan. Oblystyq ІІD baspasóz qyzmetiniń málimetinshe, kúdikti birneshe saǵattyń ishinde qolǵa túsken.
«Kúdikti óziniń túsiniktemesinde azamattyq nekedegi joldasymen birigip ishimdik ishkenin aıtqan. Ekeýi ózara sózge kelispeı, is nasyrǵa shapqan. Sol sátte kúdikti joldasyna pyshaq jaraqatyn salǵan. Qazir 33 jastaǵy áıeldiń ústinen QR QK 99-baby boıynsha is qozǵaldy. Tergeý jalǵasýda», dep málim etti oblystyq ІІD baspasóz qyzmeti.
Kúdikti áıel 1984 jylǵy. Turǵylyqty mekenjaıy Almaty qalasynda tirkelgen. Jas kelinshek óz qylmysyn jasyrmaq bolyp uıaly telefonyn da jaǵyp jibergen. Alaıda bul aılasy iske aspady deıdi, polıtseıler.
