33 myńnan astam qazaqstandyq úlken tennıspen shuǵyldanady

NUR-SULTAN. QazAqparat - Búgin Úkimet úıinde QR Premer-Mınıstri Álıhan Smaıylov Halyqaralyq tennıs federatsııasynyń prezıdenti Devıd Haggertımen kezdesý ótkizdi. Bul týraly QazAqparat Úkimettiń baspasóz qyzmetine silteme jasap habarlaıdy.

Áńgime barysynda tennısti damytý jáne atalǵan sport túrin Qazaqstanda ilgeriletýge qatysty ózara is-qımyl máseleleri talqylandy.

«Tennıs – álemdegi eń áserli jáne jaqsy tanylǵan sport túrleriniń biri. Buǵan dálel – mıllıondaǵan jankúıerler men osy sportqa degen qyzyǵýshylyqtyń udaıy artýy. Búginde tennıs sporty bizdiń azamattarymyzdyń da erekshe qyzyǵýshylyǵyn týdyryp otyr. Bul – elimizdiń álemdik qoǵamdastyqtaǵy sporttyq ımıdjin nyǵaıtý jolyndaǵy basym baǵyttardyń biri», — dedi Á. Smaıylov.

Óz kezeginde Devıd Haggertı Qazaqstanda tennıspen turaqty túrde aınalysý úshin qolaıly jaǵdaı jasaýǵa, kásibı tennısshilerdi tárbıeleýge jáne jas oıynshylardy jan-jaqty qoldaýǵa erekshe kóńil bólinetinin atap ótti.

Qazirgi tańda respýblıkamyzda 33 myńnan astam adam úlken tennıspen shuǵyldanady, onyń ishinde 15 myń bala bar. Elimizde barlyǵy 46 tennıs zaly jumys isteıdi. Balalar men jasóspirimderdiń oblystyq sport mektepterinde 30 tennıs bólimshesi ashyldy.

Oıynshylardyń jarysqa túsip, tájirıbe jınaýy úshin elde jyl saıyn 40-qa jýyq halyqaralyq týrnır ótkiziledi, olardyń qatarynda «ATP Challenger», «ITF Women’s», «World Tennis Tour: Men’s, Women’s», «ITF Junior», «ATF Junior 14&U» týrnırleri bar.

Aıta keteıik, ITF prezıdenti Nur-Sultan qalasyna bıyl 15-16 sáýirde ótetin Qazaqstan men Germanııa áıelder quramalary arasyndaǵy tennısten komandalyq álem chempıonatynyń fınalyna biliktilik kezeńi aıasynda keldi.