33 myńnan astam qazaqstandyq bilim alýshy «PISA» zertteýine qatysty

ASTANA. QazAqparat - Qazaqstandaǵy 1 myń mektep pen kolledj Ekonomıkalyq yntymaqtastyq jáne damý uıymynyń PISA-based Test for Schools - «Mektepterge arnalǵan PISA» halyqaralyq salystyrmaly zertteýine qatysty. Zertteý 15 jas aralyǵyndaǵy oqýshylardyń bilimi men mashyǵyn úsh baǵyt boıynsha baǵalaıdy: oqý, matematıka, jaratylystaný, dep habarlaıdy QazAqparat.

Sonymen qatar zertteý oqýshylardyń oqý úlgerimine áser etetin faktorlardy anyqtaýǵa múmkindik beredi. QR Oqý-aǵartý mınıstrliginiń baspasóz qyzmetinen málim etkendeı, oǵan elimizdiń barlyq aımaǵynan 33 myńnan astam qazaqstandyq bilim alýshy qatysty. Zertteý nátıjesi kelesi jyldyń 2-toqsanynda belgili bolady.

2021 jyly «Mektepterge arnalǵan PISA» zertteýi Qazaqstanda valıdatsııa kezeńinen sátti ótti. Ol kezde aprobatsııaǵa elimizdiń 200 mektebi qatysqan edi. Aprobatsııalyq zertteý nátıjeleri boıynsha jeke jáne toptyq esepter jasalyp, zertteýge qatysqan barlyq mektepke usynyldy.

«Mektepterge arnalǵan PISA-nyń» elderge arnalǵan dástúrli PISA-dan aıyrmashylyǵy – onyń jeke mektep deńgeıinde syrtqy baǵalaýdy júrgizýi. Zertteý nátıjeleri boıynsha bilim berý uıymdary elimizdiń basqa mektepteri men kolledjderimen salystyrǵanda oqýshylardyń fýnktsıonaldyq saýattylyq deńgeıi jáne PISA negizgi zertteýine qatysýshy elderdiń ortasha upaıy týraly taldamalyq esep alady. Zertteý árbir mekteptiń nemese kolledjdiń myqty jáne álsiz tustaryn anyqtaýǵa, alynǵan málimetter negizinde bilim sapasyn arttyrý sharalaryn qabyldaýǵa múmkindik beredi», - deıdi Oqý-aǵartý mınıstrligi Bilim salasyndaǵy sapany qamtamasyz etý komıtetiniń tóraǵasy Ernur Dáýenov.