33 adamdy jumyspen qamtyp otyrmyn — Túıe júninen buıym jasaıtyn mańǵystaýlyq kásipker
ASTANA. KAZINFORM — Elordada ótken «Adal azamat. Adal eńbek. Adal bıznes» forýmynda qoı men túıe júninen jasalǵan ónim arqyly 2023 jyly Mańǵystaý oblysynda «Bir aýyl — bir ónim» jobasynyń jeńimpazy bolǵan áleýmettik kásipker Jańagúl Japarova óziniń bul salaǵa qalaı kelgenin aıtyp berdi.
«Sońǵy kezde aýylda kereksiz bolyp, dalada shashylyp, órtenip jatqan qoı men túıe júni meni qatty alańdatty. Nege osyny kádege jaratpasqa degen oımen, júnnen jasalatyn ónim shyǵarý ıdeıasyn qolǵa aldym. Sol kezde «Bir aýyl — bir ónim» jobasy týraly bildim. Quryq aýylyndaǵy jumyssyz júrgen áıelderdiń basyn qosyp, túıe men qoı júninen túrli ónimder shyǵara bastadym. Osylaısha, 2022 jyly Quryq aýylynda «Bir aýyl — bir ónim» pılottyq jobasy iske qosyldy», — dedi Japarova Jańagúl.
Kásipkerdiń aıtýynsha, alǵashynda «Atameken» palatasynyń Іsker áıelder keńesi men jergilikti ákimdik tarapynan qoldaý kórsetilip, isti júrgizýge ǵımarattan tegin oryn berilgen. Sońǵy eki jylda jalpy quny 15 mln teńgeden asatyn túrli grantqa, demeýshiler qoldaýyna ıe bolǵan. Sonyń arqasynda jún óńdeýge qajetti túrli zattar men qural-jabdyqtar satyp alyp, bıznesin damytqan.
«Qazirgi tańda 33 adamdy jumyspen qamtyp otyrǵan jaıym bar. Onyń ishinde 3 adam memlekettik sýbsıdııalaýmen, áleýmettik jumys oryndary boıynsha — 2 múmkindigi shekteýli adam, kóp balaly — 8 áıel jumys isteıdi. Ónim men qaptama dızaıny jasaldy, 30-dan astam túrli trenıngter men oqýlarǵa qatystyq, óndiris tehnologııalaryn meńgerdik. Sonymen qatar, kóptegen oblystyq, respýblıkalyq jáne AQSh, Germanııa, Túrkııa, Ázerbaıjan, Mońǵolııa memleketterinde ótken halyqaralyq kórme-jármeńkelerge qatystyq», — deıdi áleýmettik kásipker.
Sondaı-aq, ol Quryq aýylynan shyqqan ónimder eksportqa ketkenin erekshe maqtanyshpen aıtty.
«2023 jyldyń maýsymynda biz Qyrǵyzstandaǵy áriptesterimizdiń usynysy boıynsha kádesyı túrinde 100 túıe jasadyq. Osylaısha qyrǵyz-qazaq kásipkerleri birigip, «Bir aýyl — bir ónim» jobasy aıasynda halyqaralyq dúkender jelisine taýar eksporttadyq», — dedi Jańagúl Japarova.
Forým barysynda Premer-Mınıstr elge janashyrlyq tanytqan kásipkerlerge alǵys aıtty.
Sondaı-aq, elimizde otandyq taýarlardyń jáne taýar óndirýshilerdiń biryńǵaı ashyq reestri ázirlenip jatqanyn málimdedi.
Odan bólek, ázirlenip jatqan «Energetıkalyq jáne kommýnaldyq sektordy jańǵyrtý» ulttyq jobasy aıasynda TÚKSh salasyna 10 trıllıon teńge ınvestıtsııa tartylatynyn atap ótti.
