3,2 mlrd teńgelik veıp saýdasy: 37 qylmystyq is tergelip jatyr
ASTANA. KAZINFORM — Qazaqstanda veıpterdiń zańsyz aınalymyna qarsy tergeý jalǵasyp jatyr. Jyl basynan beri Qarjylyq monıtorıng agenttigi zańsyz saýdanyń 25 deregin toqtatyp, 276 myńnan astam elektrondy tutyný júıesin tárkiledi. Keıbir qylmystyq shemalarda aqsha aınalymy 3,2 mlrd teńgeden asqan. Bul týraly QMA málim etti.
Eń alańdatarlyǵy — tyıym salynǵan ónimniń negizgi tutynýshylary jastar men kámeletke tolmaǵandar. Bul nıkotınge táýeldiliktiń taralýyna yqpal etip, óskeleń urpaqtyń densaýlyǵyna qaýip tóndiredi. Jyl basynan beri Qarjylyq monıtorıng agenttigi zańsyz saýdanyń 25 deregin toqtatqan.
— Qazir 37 qylmystyq is tergelip jatyr. Zańsyz aınalymnan 276 myńnan astam elektrondy tutyný júıesi tárkilendi. 18 adamǵa qatysty 14 qylmystyq is sotqa joldandy. Astanadaǵy departament veıpterdiń zańsyz aınalymyn uıymdastyrǵan qylmystyq toptyń áreketin tergep jatyr, — dep habarlady agenttikten.
QMA málimeti boıynsha, ónimderdi saqtaý úshin jalǵa alynǵan qoımalar men keńseler paıdalanylǵan. Saýda ınternet-dúkender, sondaı-aq Telegram, WhatsApp jáne Zangi messendjerleri arqyly júrgizilgen. Іz jasyrý úshin jeke kásipkerdiń bank shottary qoldanylǵan. Al satyp alýshylarǵa «turmystyq tehnıka satyp aldyq» dep aıtý usynylǵan. Bul shottar arqyly ótken aqsha kólemi 3,2 mlrd teńgeden asqan.
— Qaraǵandy oblysynda Telegram-da veıp satatyn ınternet-dúken uıymdastyrǵan adamdar 2 jyl 6 aıǵa bas bostandyǵyn shekteý jazasyna sottaldy. Olar tórt qoımany, ınternet-dúken operatorlaryn jáne kýrerlerdi paıdalanyp, zańsyz shema qurǵan. Tintý kezinde quny 340 mln teńge bolatyn shamamen 30 myń elektrondy tutyný júıesi tárkilendi, — delingen habarlamada.
Ulytaý oblysynda veıpterdi «dropperler» arqyly zańsyz satýdy uıymdastyrǵan eki jergilikti turǵynǵa aıyptaý úkimi shyqty. Aqshany alý jáne aýdarý úshin olar kýrerdiń atyna rásimdelgen bank shotyn paıdalanǵan. Sot árqaısysyna tórt jyl bas bostandyǵyn shekteý jazasyn taǵaıyndap, qylmystyq jolmen túsken tabysty tárkileýge sheshim shyǵardy.
Qarjylyq monıtorıng agenttigi elektrondy tutyný júıelerin zańsyz ákelý, saqtaý, tasymaldaý jáne satý, sondaı-aq mundaı áreketten túsken tabysty zańdastyrý qylmystyq jaýaptylyqqa ákep soǵatynyn eskertti.
Eske sala keteıik, buǵan deıin Qazaqstanǵa 500 mln teńgeniń veıpin zańsyz ákelmek bolǵandar ustalǵan edi.
