3287 agrarlyq sala ókili egis naýqanyna erte qarjylandyrýǵa qol jetkizdi
ASTANA.KAZINFORM - Bıylǵy kóktemgi dala jumystaryna qarjylandyrý baǵdarlamasyn iske asyrý jalǵasyp jatyr. Memleket basshysynyń kóktemgi dala jumystaryn ýaqytyly ári sapaly júrgizýdi qamtamasyz etý jónindegi tapsyrmasyn oryndaý aıasynda ótinim qabyldaý 2025 jyldyń 1 qazanynda bastalǵan bolatyn.
Aýyl sharýashylyǵy ónimin óndirýshiler úshin jyldyq syıaqy mólsherlemesi 5 paıyz. Búgingi tańda 556 mlrd teńge kóleminde, quramynda 3963 aýyl sharýashylyǵy taýaryn óndirýshiler bar, arnaıy top qalyptastyryldy. Sonyń ishinde 334 mlrd teńgege 3287 ótinim qarjylandyrylyp, 4 mln gektardan astam egis alqaby qamtyldy.
Sonymen qatar «Damý» qory arqyly qaryzdarǵa kepildik berý tetigi júzege asyrylyp jatyr. Bul nesıe somasynyń 85 paıyzyna deıin kepildik berýge múmkindik beredi. Qazirgi ýaqytta 148 mlrd teńge somasyna 753 kepildik berilgen.
Aýyl sharýashylyǵy málimetinshe, qarjylandyrýdyń erte bastalýy dıqandarǵa 2026 jylǵy egis naýqanyna aldyn ala daıyndalýǵa múmkindik beredi. Alynǵan qarajat tıimdi baǵamen janar-jaǵarmaı alýǵa, mıneraldy tyńaıtqyshtar satyp alýǵa, aýyl sharýashylyǵy tehnıkasyn jóndeýge jáne qajetti tuqym qoryn qalyptastyrýǵa jumsalyp jatyr.
Jeńildetilgen qarjylandyrý kóktemgi dala jumystaryn daıyndaý men ótkizýge ǵana emes, sondaı-aq ónim jınaý naýqanyna jáne maýsymdyq shyǵyndardy óteýge de qoljetimdi. Qarajat elimiz boıynsha Agrarlyq nesıe korporatsııasynyń bólimsheleri men seriktes qarjy uıymdary arqyly beriledi.
Aıta keteıik, Senat depýtaty Sáken Arýbaev óziniń depýtattyq saýalynda fermerlerdi qarjylandyrýdaǵy júıeli máselelerge nazar aýdardy.
Májilis depýtaty agrarlyq mamandyq stýdentteriniń shákirtaqysyn kóterýdi usyndy.
