32 sý sharýashylyǵy nysanynda shaǵyn GES salý josparlanyp otyr
ASTANA.KAZINFORM - «Qazsýshar» RMK-nyń sý sharýashylyǵy nysandarynda shaǵyn gıdroenergetıkanyń áleýetin arttyrý jónindegi bekitilgen Jol kartasy aıasynda kásiporyn shaǵyn GES salýǵa arnalǵan 32 nysandy iriktep aldy. Bul týraly Sý resýrstary jáne ırrıgatsııa mınıstrligi habarlady.
Qazir Qaraǵandy oblysyndaǵy Samarqand sý qoımasynda, Aqtóbe oblysyndaǵy Qarǵaly sý qoımasynda jáne Abaı oblysyndaǵy Qarakól sý qoımasynda shaǵyn GES salýǵa arnalǵan jobalaý-smetalyq qujat ázirlenip jatyr.
Sonymen qatar kásiporyn taǵy 23 joba boıynsha qajetti qujatty ázirleý úshin esepteýler júrgizip jatyr. Jol kartasy aıasyndaǵy basym nysandar retinde Qostanaı oblysyndaǵy Qaratomar jáne Joǵarǵy Tobyl sý qoımalary, Jetisý oblysyndaǵy «Aıaq-Qunshan» magıstraldyq kanaly jáne Túrkistan oblysyndaǵy Úlken Keles magıstraldyq kanaly aıqyndaldy. Eńbekshiqazaq aýdanyndaǵy Úlken Almaty kanalynyń tranzıttik ýchaskelerinde shaǵyn GES ornatý maqsatynda «Qazsýshar» RMK jeke ınvestormen memorandým jasasty.
– Barlyq joba tolyq iske asyrylǵan jaǵdaıda «Qazsýshar» RMK nysandarynda óndiriletin elektr energııasynyń jalpy qýaty jylyna 30 MVt-qa jetedi. Qazirgi tańda kásiporynnyń balansynda úsh shaǵyn GES bar. Olar Soltústik Qazaqstan oblysyndaǵy Sergeev gıdrotorabynda, Qaraǵandy oblysyndaǵy Yntymaq sý qoımasynda jáne Qorǵas ózenindegi «Dostyq» gıdrotorabynda ornalasqan, – dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, Bishkekte Qazaqstan, Qyrǵyzstan jáne Ózbekstannyń energetıkalyq jáne sý sharýashylyǵy vedomstvolary ókilderiniń jumys kezdesýi ótti.
