32 myńnan asa otbasy jalǵa beriletin jáne kredıttik pátermen qamtamasyz etiledi

NUR-SULTAN. QazAqparat – 32 myńnan astam otbasy jalǵa beriletin jáne kredıttik pátermen qamtamasyz etiledi. Bul týraly Úkimet otyrysynda «Nurly jer» baǵdarlamasynyń iske asyrylýyn talqylaý kezinde QR Premer-Mınıstri Asqar Mamın málim etti, dep habarlaıdy QazAqparat tilshisi.

«Kredıttik turǵyn úı boıynsha 9 óńir ǵana oblıgatsııa shyǵarýǵa daıyn, ıaǵnı Almaty, Jambyl, Qostanaı, Qyzylorda, Túrkistan, Shyǵys Qazaqstan oblystary jáne Nur-Sultan, Shymkent, Almaty qalalary. Al qalǵan óńirler bul baǵyt boıynsha jumysty uıymdastyrmaǵan», - dep toqtaldy A. Mamın Úkimet otyrysynda.

Onyń sózine qaraǵanda, jalǵa beriletin úılerdiń qurylysyn qarjylandyrý tórt óńirden basqa barlyq oblystarda ýaqytynda júrgizilýde. Batys Qazaqstan, Jambyl oblystary men Nur-Sultan, Almaty qalalary bul rásimderdi keıinge qaldyryp ótkizbegen.

Osy oraıda Úkimet basshysy ákimderge qurylystyń qarqynyn jyldamdatýdy, josparlanǵan merzimderge sáıkes qurylysty aıaqtaýdy tapsyrdy.

Budan bólek, A. Mamın «Nurly jer» baǵdarlamasynyń áleýmettik baǵytyna toqtaldy.

«Bıyl halyqtyń áleýmettik jaǵynan osal toptary, az qamtylǵandar, jastar jáne bıýdjettik uıymdar qyzmetkerleri sanatynan 32 myńnan astam otbasyny jalǵa briletin ári kredıttik pátermen qamtamasyz etý josparlanǵan. Osy rette Indýstrııa jáne ınfraqurylymdyq damý mınıstrligine ákimdiktermen birlese osy sanattaǵy adamdarǵa turǵyn úı qurylysyn tolyq kólemde qamtamasyz etýdi tapsyramyn», - dedi Premer-Mınıstr.