32 mln teńgeni jymqyrdy degen esepshi 7 jylǵa bas bostandyǵynan aıyryldy
ALMATY. QazAqparat - Almatyda 32 mln teńgeni jymqyrdy degen kúdikpen ustalǵan zoobaq esepshisi 7 jylǵa bas bostandyǵynan aıyryldy, dep habarlaıdy QazAqparat tilshisi sot zalynan.
Úkimdi sýdıa Farrýh Omarov oqydy.
«Marına Nazarova QR QK 241-baby boıynsha Almaty zoologııalyq parki MKK-ine zalal keltirip jáne QR QK 189-babynyń 4-bólimi boıynsha ózgeniń senip tapsyrǵan múlkin tonady degen aıyp sotta dáleldendi. Eki bap boıynsha Nazarovany túpkilikti 7 jylǵa bas bostandyǵynan aıyryp, 5 jylǵa esepshilik, memlekettik qyzmetke taǵaıyndalýyna tyıym salynady», - dedi sýdıa Omarov.
Sonymen qatar sýdıa Nazarovanyń múlkin tárkilep, 32 mln teńgeni óndirý týraly sheshim shyǵardy. Sondaı-aq, 100 AEK, 212 000 teńge kóleminde aıyppul salyndy.
Jaryssóz barysynda prokýror Erjan Quraqbaev sottalýshyny aıypty dep tanyp, 8 jylǵa bas bostandyǵynan aıyrýdy suraǵan bolatyn.
Aıta ketý kerek, 37 jastaǵy kúdikti Marına Nazarova 14 tamyzda ustalǵan bolatyn. Oǵan qarsy quny 32 mln teńge bolatyn bıletterdi kompıýterden joıyp jiberdi degen aıyp taǵyldy.
