32 myńnan astam ótinish: Shymkentte sheteldik jumysshylar qaı salaǵa qajet
ShYMKENT. KAZINFORM — Bıyl Shymkentte shetel azamattaryn jumysqa tartýǵa 18 myńnan astam kvota bólingen. Ótken jyly 19 myń kvota berilgen. Bul týraly qalalyq jumyspen qamtý jáne áleýmettik qorǵaý basqarmasy málim etti.
Basqarma málimetinshe, jyl basynan beri jumys berýshilerden sheteldik mamandardy tartýǵa qatysty 32 myńnan astam ótinish túsken. Onyń 17 840-y boıynsha jumys isteýge ruqsat berilgen, 2709 azamattyń ruqsat merzimi uzartylǵan. Al 11 717 ótinish boıynsha usynylǵan qujattardaǵy kemshilikterge baılanysty ruqsat berýden bas tartylǵan.
Shymkent qalalyq jumyspen qamtý jáne áleýmettik qorǵaý basqarmasynyń bólim basshysy Damıra Eshenqulovanyń aıtýynsha, sheteldik jumys kúshin tartýǵa jeke jáne zańdy tulǵalarǵa bólek ruqsat beriledi. Kásiporyndar negizinen joǵary bilimi men tıisti biliktiligi bar mamandarǵa suranys bildirgen.
— Jyl saıyn bul salaǵa Eńbek mınıstrligi tarapynan kvota bólinedi. Bıyl zańdy tulǵalarǵa 285 kvota, jeke tulǵalarǵa 18 myń kvota qarastyrylǵan. Qazirgi tańda zańdy tulǵalarǵa bólingen 285 kvotanyń 115-i boıynsha 18 mekemege ruqsat berildi. Olardyń basym bóligi Qytaı, Úndistan jáne Túrkııa azamattary. Olar Shymkenttegi iri zaýyttarda, sonyń ishinde «Hımfarm», «PetroQazaqstan» jáne «Azııa Trafo» sııaqty kásiporyndarda jumys isteý úshin kelgen, — dedi Damıra Eshenqulova.
Al jeke tulǵalarǵa beriletin ruqsat boıynsha shetel azamattary negizinen qurylys salasynda eńbek etedi. Olardyń deni — Ózbekstan azamattary, jalpy sany 17 606 adam. Sonymen qatar Tájikstannan 193, Ázerbaıjannan 41 azamat kelgen.
Basqarma ókiliniń aıtýynsha, sheteldik jumys kúshine qajettilik artqan jaǵdaıda Eńbek jáne halyqty áleýmettik qorǵaý mınıstrliginen qosymsha kvota suratýǵa bolady.
— Shetel azamattaryna jumys isteýge beriletin ruqsattyń merzimi bir aıdan 12 aıǵa deıin belgilenedi. Onyń uzaqtyǵy jumys kólemine jáne jumys berýshiniń qajettiligine baılanysty aıqyndalady. Zańdy tulǵalar sheteldik mamandardy jumysqa tartý kezinde olardyń tıisti biliktiligin rastaıtyn qujattardy, sonyń ishinde dıplomdaryn usynýy qajet. Jeke tulǵalar da zańnamada kózdelgen qujattardy tapsyrady. Ótinishter zań talaptaryna sáıkes eki jumys kúni ishinde qaralady, — dedi Damıra Eshenqulova.
Aıta keteıik, buǵan deıin áleýmettik jelide Shymkenttegi kásiporyndardyń birinde shetel azamatyn zańsyz ustap otyrǵany týraly aqparat taraǵan bolatyn. Polıtsııa júrgizgen tekserý nátıjesinde bul aqparat rastalmady. Alaıda kásiporyn aýmaǵynda Qazaqstanda zańdy júrgenin rastaıtyn qujattary joq shetel azamattary bolǵany anyqtaldy. Sot sheshimimen 42 shetel azamaty kóshi-qon zańnamasyn buzǵany úshin ákimshilik jaýapkershilikke tartyldy.
