3,2 myńnan asa etnıkalyq qazaq qandas mártebesin aldy

ASTANA. KAZINFORM — 2025 jyly 3 203 etnıkalyq qazaq tarıhı otanymen tabysyp, qandas mártebesin aldy, dep habarlaıdy Eńbekmıni.

— Jalpy 1991 jyldan beri respýblıkaǵa 1 mln 151 myńnan astam etnıkalyq qazaq oraldy. Jyl basynan Qazaqstanǵa kelgen qandastardyń jartysy (48,1%) Qytaıdan, 39,5% — Ózbekstannan, 5,8% — Túrikmenstannan, 2,5% — Monǵolııadan, 1,9% — Reseıden jáne 2,2% basqa elderden. Osy jylǵy 1 sáýirdegi jaǵdaı boıynsha eńbekke qabiletti jastaǵy etnıkalyq qonys aýdarýshylar sany 60,7%-dy, eńbekke qabiletti jastan kishi 31,1%-dy jáne zeınetkerler 8,2%-dy quraıdy. Eńbekke qabiletti jastaǵy qandastardyń ishinen bilim deńgeıi boıynsha 17,9%-y joǵary bilimdi, 27,8%-y orta kásibı bilimdi, 52,9%-y jalpy orta bilimdi, jáne 1,4% bilim joq, — delingen mınıstrlik habarlamasynda.

Qonys aýdarǵan etnıkalyq qazaqtar respýblıkanyń túrli óńirlerine qonystandy.

Sonymen birge, qandastardy qonystandyrý úshin kelesideı eńbek kúshi tapshy óńirler anyqtaldy: Aqmola, Abaı, Qostanaı, Pavlodar, Atyraý, Batys, Shyǵys jáne Soltústik Qazaqstan oblystary.

Qonystandyrý óńirlerinde 2025 jylǵa arnalǵan qandastardy qabyldaý kvotasy 2 309 adamdy quraıdy. 2025 jylǵy 1 sáýirdegi jaǵdaı boıynsha qonystandyrý óńirlerine 642 qandas qonys aýdardy.

Joǵaryda atalǵan óńirlerde qonystanǵan qandastarǵa kóshýge sýbsıdııa túrinde memlekettik qoldaý sharalary usynylady — bir mezgilde otaǵasyna jáne otbasynyń árbir múshesine 70 AEK (275,2 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge — bir jyl ishinde 15-ten 30 AEK (59-den 118 myń teńgege deıin) mólsherinde.

Jyl basynan beri 147 qandasqa túrli qoldaý sharalary kórsetildi. Atap aıtqanda, 94 adam turaqty jumysqa ornalastyryldy.

Sonymen qatar erikti qonys aýdarýdyń tıimdiligin arttyrý maqsatynda azamattardy soltústik óńirlerge qonys aýdarýǵa qatysatyn jumys berýshilerdi qoldaý boıynsha ınstıtýtsıonaldyq sharalar qabyldandy. Turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin ekonomıkalyq utqyrlyq sertıfıkaty turǵyn úı qunynyń 50%-y nemese bir otbasyna 4,56 mln teńgege deıin mólsherinde birjolǵy óteýsiz jáne qaıtarymsyz negizde engizildi.

Osyǵan deıin Qytaıda qandasymyz jeńil atletıkadan bir aptada eki ret bas júlde jeńip alǵanyn jazdyq.