32 altyn: Qazaqstan Kóshpendiler oıyndarynda jalpykomandalyq esepte top jardy
ASTANA. KAZINFORM — Qazaqstan quramasy 31 tamyz ben 6 qyrkúıek aralyǵynda Qyrǵyzstanda ótken VI Dúnıejúzilik kóshpendiler oıyndaryna qatysty. Oıyndar qorytyndysy boıynsha qazaqstandyq sportshylar 74 medal jeńip aldy. Bul týraly Sport jáne týrızm mınıstrligi málim etti.
Onyń ishinde 32 altyn, 20 kúmis jáne 22 qola júlde bar. Jalpykomandalyq esepte 30 altyn medal ıelengen Qyrǵyzstan ekinshi orynǵa, jeti altyn júldesi bar Reseı úshinshi orynǵa turaqtady.
2 qyrkúıek kúni VI Dúnıejúzilik kóshpendiler oıyndarynda Qazaqstan quramasy aýdaryspaqtan eki altyn medal jeńip aldy.
Saılaý Muhammedjan da fınalda qyrǵyz sportshysymen kezdesip, 2:1 esebimen jeńiske jetti. Bul – Qazaqstan quramasynyń dúbirli dodadaǵy alǵashqy altyn medaldary.
Sol kúni VI Dúnıejúzilik kóshpendiler oıyndary aıasynda «Kóchmóndór júrúshú» halyqaralyq at marafonynyń alǵashqy kezeńi aıaqtaldy. Jarystyń birinshi kúninde qatysýshylar jalpy uzyndyǵy 300 shaqyrym bolatyn qashyqtyqtyń 50 shaqyrymyn baǵyndyrdy.
Birinshi kezeń qorytyndysy boıynsha Qazaqstan quramasy kósh bastady. Ekinshi orynda Qyrǵyzstannyń «Ala-Too» komandasy, úshinshi orynda Qyrǵyzstannyń «Ystyqkól» komandasy keledi.
Turmahanbet Qalmuhan — Alysh kúresinen qola júldeger atandy.
Alysh — belbeý kúresinen erkin stıl boıynsha 60 kelige deıingi salmaqta synǵa túsken Ábýbákirov Jandos júldeli III orynǵa taban tirep, qola medal ıelendi.
Jarystyń úshinshi kúninde Samboshy Bolat Sapar Kóshpendiler oıyndarynda altyn júlde jeńip aldy.
Bul kúni Qazaqstan quramasy arqan tartystan taǵy bir altyn júldeni qorjynǵa saldy.
Osylaısha Qazaqstan quramasy oıyndardyń úshinshi kúninde 12 altyn, 7 kúmis, 5 qola medal jeńip aldy.
4 qyrkúıekte qazaq kúresinen 60 keli salmaqta synǵa túsken qazaqstandyq sportshy Ernur Súleımen jeńimpaz atandy.
Ulttyq sporttyń biri – teńge ilý saıysynan Qazaqstan sportshysy Baqtybaı Qanat jeńimpaz atandy.
Sol kúni VI Dúnıejúzilik kóshpendiler oıyndarynyń aralyq qorytyndysy boıynsha Qazaqstan quramasy jalpykomandalyq esepte kósh basyna shyqty.
Al 5 qyrkúıek kúni Qazaqstan quramasy 300 shaqyrymdyq at jarysynda úzdik atandy.
Mangala jarysynda erler arasyndaǵy komandalyq jarysta Astana qalasynyń sportshysy Bıǵalı Zkrııaev altyn medal aldy.
Osylaısha 6 qyrkúıekte Qazaqstan quramasynyń altyn medal sany 32-ge jetti.
Roza Baǵlanova atyndaǵy «Qazaqkontsert» memlekettik akademııalyq kontserttik uıymynyń «Gúlder» memlekettik ansambli Qyrǵyzstanda ótken VI Dúnıejúzilik kóshpendiler oıyndarynyń Nomad Fest festıvali aıasyndaǵy halyqaralyq «Etno-bı» baıqaýynda Gran-prı ıelendi.
Kúlásh Baıseıitova atyndaǵy Qazaq ulttyq óner ýnıversıteti kolledjiniń «Estradalyq vokal» mamandyǵynda bilim alyp jatqan 3-kýrs stýdenti Jasmına Tileýmbetova Qyrǵyzstandaǵy VI Dúnıejúzilik kóshpendiler oıyndary aıasynda ótken Echo of Nomads halyqaralyq etnıkalyq án baıqaýynda ekinshi oryn ıelendi.
Qazaqstandyq sportshylar aýdaryspaq, jamby atý, qazaq kúresi, alysh, armrestlıng, arqan tartys, toǵyzqumalaq, mangala, dástúrli sadaq atý, at jarysy jáne basqa da ulttyq sport túrlerinen jeńimpaz jáne júldeger atandy.
VI Dúnıejúzilik kóshpendiler oıyndaryna 113 elden 3 myńǵa jýyq sportshy qatysty.
