319 mln teńge grant – 16 mlrd teńge nátıje: ınnovatsııalyq jobalar qalaı tabys ákeldi
ASTANA. KAZINFORM – Qazaqstanda memlekettik qoldaý alǵan jekelegen ınnovatsııalyq jobalar bólingen qarajattan birneshe ese joǵary ekonomıkalyq nátıje berip otyr. Bul týraly Úkimet otyrysynda Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev málimdedi.
Mınıstrdiń aıtýynsha, memlekettik qoldaý naqty jobalar arqyly óz tıimdiligin kórsetip otyr. Aldymen aýyl sharýashylyǵy salasyndaǵy mysalǵa toqtaldy.
– EcoSave jobasy ósimdikterdi qorǵaýǵa arnalǵan bıopreparat shyǵarady. Onyń arqasynda ónimdilik 15%-ǵa artty, al pestıtsıd qoldaný azaıdy. Óndiris kólemi 760 myń lıtrge deıin jetti. Bul jobaǵa 110 mln teńge grant berilip, nátıjesinde 1,8 mlrd teńge ekonomıkalyq áser alyndy, – dedi ol.
Al ónerkásip salasynda nátıje odan da joǵary.
– Asia Trafo jobasy elektr energetıkasyna arnalǵan 500 kılovolttyq reaktor shyǵardy. Sonyń arqasynda ımporttyq ónimder almastyrylyp, 23 qurylǵy iske qosyldy. 319 mln teńge grant bólinip, 16 mlrd teńge ekonomıkalyq nátıje alyndy, – dedi mınıstr.
ıAǵnı, jobalar az qarjynyń ózin tıimdi paıdalanyp, birneshe ese qaıtarym berip otyr. Bul úrdis startaptar sektorynda da baıqalady.
– Tumar Ventures qory 22 startapty qarjylandyrdy. Nátıjesinde olardyń jalpy quny 215 mln AQSh dollarynan 457 mln AQSh dollaryna deıin ósti. Mysaly, JobEscape jobasy 3 mln-nan 32 mln AQSh dollaryna deıin, al zypl.ai 10 mln-nan 80 mln AQSh dollaryna deıin ósti, – dedi Jaslan Mádıev.
Mınıstrdiń sózinshe, mundaı nátıjeler ınnovatsııanyń tek ıdeıa emes, naqty tabys ákeletin quralǵa aınalyp jatqanyn kórsetedi.
Aıta keteıik, buǵan deıin Jaslan Mádıev ınnovatsııalyq jobalarǵa salynǵan árbir teńge eki ese qaıtarym berip otyrǵanyn málimdegen edi.
