31,6 myńnan astam nysan múgedektigi bar adamdar úshin beıimdeldi
ASTANA. KAZINFORM – 2026 jyldyń sońyna deıin elimizde 34 573 áleýmettik ınfraqurylym nysanyn beıimdeý josparlanǵan.
Eńbek jáne halyqty áleýmettik qorǵaý mınıstrligi múgedektigi bar adamdar úshin qoljetimdi orta qalyptastyrý baǵytyndaǵy júıeli jumysty jalǵastyryp jatyr. Bul jumys Qazaqstan Respýblıkasynyń 2025–2030 jyldarǵa arnalǵan ınklıýzıvti saıasat tujyrymdamasy, Jol kartasy jáne Memleket basshysynyń tapsyrmasy boıynsha iske asyrylyp jatqan «Halyqpen birge» jobasy aıasynda júrgizilip jatyr.
2026 jyldyń sońyna deıin elimizde 34 573 áleýmettik ınfraqurylym nysanyn beıimdeý josparlanǵan. Aǵymdaǵy jylǵy 1 tamyzdaǵy jaǵdaı boıynsha olardyń 31 673-i beıimdelip, bul Qoljetimdiliktiń ınteraktıvti kartasyna engizilgen nysandardyń jalpy sanynyń 73%-yn quraıdy.
Beıimdelgen nysandar qatarynda bilim berý, densaýlyq saqtaý, mádenıet uıymdary, memlekettik mekemeler, sondaı-aq saýda jáne qyzmet kórsetý salasynyń obektileri bar. Beıimdeý jumystaryn júrgizý barysynda múgedektigi bar adamdardyń barlyq sanaty úshin kedergisiz qoljetimdilikti qamtamasyz etýge erekshe nazar aýdarylady.
Qoljetimdi orta qalyptastyrý jumystary elimizdiń barlyq óńirinde júrgizilýde. Jergilikti atqarýshy organdar memlekettik mekemelermen jáne bıznes ókilderimen birlesip, azamattardyń qajettilikteri men ótinishterin eskere otyryp, nysandardy qoljetimdiliktiń zamanaýı talaptaryna sáıkes kezeń-kezeńimen beıimdeýde.
QR Eńbek jáne halyqty áleýmettik qorǵaý mınıstrligi múgedektigi bar adamdardyń áleýmettik ınfraqurylym nysandary men memlekettik qyzmetterge teń qoljetimdiligin qamtamasyz etý maqsatynda kedergisiz orta qalyptastyrý jónindegi is-sharalardy odan ári jalǵastyrady.
Aıta ketelik múgedektikti rásimdeý: qandaı qujattar qajet jáne qandaı talaptar bar ekendigi týraly jazǵan edik.
