31 jeltoqsanda astanalyqtardy qandaı merekelik sharalar kútip tur

ASTANA. KAZINFORM — 31 jeltoqsan kúni tústen keıin Astananyń alty aýdanynyń on jerinde qazaqstandyq estrada juldyzdary men shyǵarmashylyq ujymdardyń qatysýymen merekelik jańa jyldyq kontsertter ótedi, dep habarlaıdy elorda ákimdiginiń resmı saıty.

Almaty aýdanynda «Jeruıyq» saıabaǵynda jáne «Jeleznodorojnyı» turǵyn alabynda, «Nura»aýdanynda «Jaǵalaý»skverinde jáne «Úrker» turǵyn alabynda, «Saraıshyq» aýdanynda, «Otaý» jáne «Promyshlennyı» turǵyn alaptarynda saǵat 12.00-den bastap merekelik kontserttik baǵdarlamalar ótedi.

«Baıqońyr» aýdanynda «Atatúrik» saıabaǵynda jáne «Óndiris» turǵyn alabynda, «Esil» aýdanynda «Baǵystan» turǵyn alabynda jáne «Saryarqa» aýdanynda «Qorǵaljyn» saıabaǵynda kúndizgi jańa jyldyq baǵdarlama saǵat 14.00-den bastap ótedi.

Jańa jyl qarsańynda 31 jeltoqsannan 1 qańtarǵa deıin qalanyń úsh jerinde merekelik is-sharalar ótedi.

31 jeltoqsan kúni saǵat 21:00–den bastap «Qazaq eli» monýmentiniń janyndaǵy alańda, «EXPO» aýmaǵynda, sondaı-aq qalalyq alańda (ákimdik aldynda) shyǵarmashylyq ujymdar men qazaqstandyq estrada juldyzdarynyń qatysýymen qala turǵyndary men qonaqtary úshin jańa jyldyq merekelik kontsertter ótedi.

Іs-sharalarǵa otandyq estrada juldyzdary Zarına Omarova, Erkesh Hasen, Marjan Arapbaeva, Sáken Maıǵazıev, Qazybek Quraıysh, Serik Ibragımov, Jubanysh Jeksenuly, Aqbota Kerimbekova, «Melomen», «Báıterek» toptary jáne basqa da ártister qatysady.

— Elorda turǵyndary men qonaqtaryn resmı derekkózderde ornalastyrylǵan aqparatqa senýge jáne ózge de kózderden taratylatyn durys emes málimetterge nazar aýdarmaýǵa shaqyrady, — delingen habarlamada.

Osydan buryn Almatyda Jańa jyl merekesinde qandaı sharalar ótetinin jazǵan edik.