31 telearna jýrnalısterine qoqan-loqy jasaǵan sot oryndaýshylarynyń áreketterine qyzmettik tekserý júrgizilýde

Atalmysh tekserýlerdiń qorytyndysy kópshilikke jarııa etiledi. Bul týraly búgin buqaralyq aqparat quraldarynyń ókilderimen bolǵan baspasóz máslıhatynda Joǵarǵy sot janyndaǵy Sot ákimshiligi komıteti tóraǵasynyń birinshi orynbasary Baqtııar Ónerbaev málim etti, dep habarlaıdy QazAqparat.

Esterińizge sala keteıik, atalmysh oqıǵa naýryzdyń 25-i kúni Astanada boldy. Elordadaǵy páterlerdiń birinde eki balasymen turyp jatqan Aqtoty Túsip atty azamatshany sot oryndaýshylarynyń páterden shyǵarǵaly jatqandyǵy jóninde sıýjet túsirýge barǵan 31-shi arnanyń tilshisi Juldyz Tóleý men operator Baýyrjan Smaǵulovqa sot oryndaýshylar qoqan-loqy jasaǵan. Sot oryndaýshylary jýrnalısterdiń mundaı habar túsirýge quqyqtarynyń joqtyǵyn aıtyp, tilshiniń kýáligin tartyp alyp, budan soń operatordyń beınekamerasyn tartyp almaq bolǵan. Osy ýaqytta «Laıyqty páter úshin» qozǵalysynyń belsendileri kelip, jýrnalısterge jaqtasqan. Odan ári aqparat quralynyń ókilderi páterinen shyǵarylǵaly jatqan azamatshanyń úıine jasyrynyp, sot oryndaýshylary ketkenshe sonda otyrǵan.