31 tamyz. QazAqparat kúntizbesi
ATAÝLY KÚNDER
Blog kúni
Alǵash ret 2005 jyly atalyp ótken. Meıramnyń dál osy kúnge belgilenýi mynaǵan baılanysty: blog sózin san retinde elestetse, 3108-ge uqsaıdy, ıaǵnı osylaısha 31 tamyz paıda bolady.
Blog kúniniń negizgi mindeti – blogerlerge ártúrli elderdegi áriptesterimen tanysýǵa múmkindik jasaý.
ESTE QALAR OQIǴALAR
1992 jyly Qazaqstan Respýblıkasynyń Memlekettik qoımasy baǵaly metaldardyń alǵashqy partııasyn qabyldady. Olardyń qatarynda «tórt toǵyzdyq» sapasyndaǵy altynnyń 5 kesegi jáne 2 kúmis kesek boldy.
2007 jyly Tarazda Abaıdyń eskertkishi ornatyldy. Granıt tuǵyrynda ashylǵan kitap ornalasqan. Bir betinde – uly aqyn, fılosoftyń músini, ekinshisinde – árbir qazaqty bir-birine dos retinde qaraýǵa shaqyratyn qara sózi jazylǵan. Eskertkishtiń bıiktigi – 4 metr.
2010 jyly Jetisý Alataýy jotasynyń soltústik taý bókterinde «Jońǵar-Alataý memlekettik ulttyq tabıǵat parki» ashyldy. Bul aýmaqta Qyzyl kitapqa engen, joıylý qaýpi aldynda turǵan «Sıver almasy» ósedi. «Jońǵar-Alataý memlekettik ulttyq tabıǵı parkiniń» jalpy aýmaǵy – 356 022 gektar.
2012 jyly Qazaqstannyń táýlik boıy habar taratatyn «24KZ» tuńǵysh jańalyqtar telearnasy iske qosyldy. Telearna álemde bolyp jatqan oqıǵalar týraly aýqymdy aqparat berip, Qazaqstan jańalyqtarynan habardar etedi. Atalǵan arna «OtaýTV» ulttyq spýtnıktik jelisi arqyly jáne kabeldik jelilerde kórsetiledi.
2013 jyly Óskemende jazýshy Oralhan Bókeıdiń eskertkishi ashyldy. Oralhan Bókeı eskertkishiniń avtorlary – belgili óskemendik músinshiler Vladımır Samoılov pen Evgenıı Nepıanov.
Oralhan Bókeı 1943 jyly Shyǵys Qazaqstan oblysy Qatonqaraǵaı aýdanynda dúnıege kelgen. Alǵashqy áńgimeler jınaǵy – «Qamshyger» 1970 jyly shyqty. Oralhannyń kitaptary nemis, slovak, bolgar, aǵylshyn, vengr, arab, qytaı, japon jáne burynǵy KSRO elderiniń tilderine aýdaryldy.
2014 jyly WBA (Super) jáne IBO nusqalary boıynsha bokstan Álem chempıony qazaqstandyq Gennadıı Golovkın «10 joıqyn pancherdiń» reıtıngine endi.
2016 jyly Astanada Qazaqstannyń Ulttyq horeografııa akademııasy ashyldy.
2021 jyly Rýmynııanyń Kraıova jáne Konstantsa qalalarynda «Túrki áleminen bir tynys» kontserti men «Ázerbaıjan, Qazaqstan, Qyrǵyzstan, Ózbekstan jáne Túrikmenstan táýelsizdigine 30 jyl» fotokórmesi ótti.
TÚRKSOI-dyń Rýmynııaǵa sapary aıasynda delegatsııa Medjıdııa qalasyndaǵy «Qazaqstan» alańyna jáne qazaqtyń uly kompozıtory Qurmanǵazynyń eskertkishine bardy. Ázerbaıjan, Qazaqstan, Qyrǵyzstan, Túrkııa jáne Túrikmenstan elderiniń túrki áleminiń ónerpazdary uly kompozıtordyń rýhyna taǵzym etip, Qurmanǵazynyń eskertkishiniń aldynda áıgili týyndylarynyń biri – «Adaı» kúıi tartyldy.
2021 jyly Dýbaıda (BAÁ) ótken bokstan jastar arasyndaǵy Azııa chempıonatynda qazaqstandyq boksshylar barlyq medaldy jeńip aldy. 51 nagrada jıyntyǵynyń ishinde qazaqstandyqtar 49 medal utty: 19 altyn, 15 kúmis jáne 15 qola.
