31 tamyzdan bastap kimderge nesıeni merziminen buryn aıyppulsyz tóleýge ruqsat beriledi

ASTANA. KAZINFORM – Qarjy naryǵyn retteý jáne damytý agenttigi 31 tamyzdan bastap kúshine enetin zań normasynyń mánin túsindirdi.

- Bıylǵy 31 tamyzdan bastap zańdaǵy jańa ózgeris kúshine enedi. Bul ózgeris nesıeni merziminen buryn japqany úshin komıssııalyq tólemdi nemese aıyppuldy tek zańdy tulǵalardan ǵana alýǵa ruqsat beredi. Bul tutynýshylardyń quqyqtaryn kúsheıtip, nesıe qoldanǵany úshin artyq tóleıtin somany tómendetý úshin jasalyp otyr. Endi artyq tólem tek nesıeni qoldanǵan merzimge ǵana alynady. Merziminen buryn tolyq nemese ishinara jaýyp tastaǵan jeke tulǵalardan komıssııa men aıyppul alynbaıdy, - agenttiktiń áleýmettik jobalar jáne qarjylyq saýattylyqty arttyrý departamentiniń bas mamany Dmıtrıı Akmaev.

Biraq bul nesıeni resimdegen kelisimsharttyń mátininde jazylǵan sharttardy múldem eskerýdiń qajeti joq degen sóz emes.

- Azamattar nesıeni rásimdegen kelisimshartta merzimimnen buryn jabatyn nesıeniń mınımaldy somasy nemese naqty soma kórsetilgen bolýy múmkin ekenin eskerý kerek. Mysaly, bank nemese mıkroqarjy uıymy kelisimshartta nesıeni merziminen buryn jabýǵa aılyq tólemniń kóleminde ǵana nemese jartysyna teń mólsherde ǵana ruqsat etiletinin jazyp qoıǵan bolýy múmkin. Nesıeni merziminen buryn jabar kezde osyny mindetti túrde eskergen abzal, - dedi agenttiktiń bas mamany.

Zań normasy kúshine engenimen nesıeni merziminen buryn jabardyń aldynda nesıe bergen banktiń nemese mıkroqarjy uıymynyń mamandarynyń aldynan ótý kerek.

- Zańdaǵy jańashyldyq tek qaıta jasalatyn kelisimsharttarǵa ǵana júredi nemese nesıe merzimi uzaq jáne merziminen buryn japqany úshin aıyppul qarastyrylǵan bolý kerek. Mundaı jaǵdaıda tutynýshy ózine nesıe bergen uıymǵa kelisimshartty qaıta qaraý týraly ótinishpen júginýge haqyly, - deıdi Dmıtrıı Akmaev.

Buǵan deıin nesıe resimdegende qosa qaryz alýshy qandaı jaýapkershilik arqalaıtynyn jazǵan edik.