31 mln teńge jymqyrǵan kúdikti Reseıden ekstradıtsııalandy

ASTANA. KAZINFORM — Bas prokýratýra senip tapsyrylǵan bótenniń múlkin asa iri mólsherde urlaǵany úshin qylmystyq jaýaptylyqqa tartý úshin kúdiktini Reseı Federatsııasynan ekstradıtsııalady. 

— Tergeý nusqasy boıynsha ol 2015-2017 jyldar aralyǵynda Astana qalasy bankteriniń biriniń fılıalynyń jetekshi menedjeri bola otyryp, somasy 31 mıllıon teńgeden astam aqsha qarajatyn ıemdenip, talan-tarajǵa salǵan, — delingen Bas prokýratýra habarlamasynda.

Qylmys jasaǵannan keıin kúdikti jasyrynyp, osyǵan baılanysty halyqaralyq izdeý jarııalandy.

Ótken jyldyń maýsym aıynda izdeýde júrgen adam Reseı Federatsııasynyń Máskeý qalasynda ustaldy jáne Qazaqstan Respýblıkasy Bas prokýratýrasynyń suraýy boıynsha Qazaqstanǵa ekstradıtsııalandy.

Qazirgi ýaqytta ol tergeý ızolıatoryna qamaldy.

Aıyptalǵan qylmysty jasaǵany úshin múlkin tárkileýmen jeti jyldan on eki jylǵa deıingi merzimge bas bostandyǵynan aıyrý jazasy qarastyrylǵan. 

Aıta ketelik jalǵan aqsha jasaǵany úshin Qazaqstan azamaty Grýzııadan ekstradıtsııalanǵan edi.