3,1 mln oqýshy jazda saýyqtyrý, demalys baǵdarlamalarymen qamtylady
ASTANA. KAZINFORM – Bıylǵy jyldyń jaz mezgilinde elimiz boıynsha 3,1 mıllıonnan astam bala saýyqtyrý, demalys jáne eńbekpen qamtýǵa baǵyttalǵan túrli baǵdarlamalarmen qamtylatyn bolady. Bul týraly Oqý-aǵartý mınıstrliginiń baspasóz qyzmeti habarlady.
Onyń ishinde 500 myńnan astam bala áleýmettik osal sanattaǵy otbasylardan. «Qazaqstan halqyna» qorynyń qoldaýymen taǵy da 10 myń bala tegin demalýǵa múmkindik alady.
Jazǵy demalys baǵdarlamasy ártúrli baǵyttardy qamtıdy: eńbek jáne shyǵarmashylyq belsendilik, týrıstik jáne tanymdyq marshrýttar, zııatkerlik ári bilim berý is-sharalary, sondaı-aq halyqaralyq jobalar men forýmdarǵa qatysý.
Barlyq uıymdastyrý sharasy 9 memlekettik organnyń qatysýymen ázirlengen biryńǵaı jospar aıasynda iske asyrylady. Osy maqsatta respýblıkalyq jáne óńirlik deńgeıde shtabtar qurylyp, bıylǵy jyly jumys jasaıtyn demalys ortalyqtarynyń tizimi jasaqtaldy.
Balalardyń qaýipsizdigin qamtamasyz etýge erekshe kóńil bólinýde. Sanıtarlyq talaptardyń saqtalýy, taǵam qaýipsizdigi, sondaı-aq sý aıdyndarynda, ormandar men sport nysandarynda saqtyq sharalary qatań baqylaýda bolady.
— Qaýipsiz ári belsendi jazǵy demalys mádenıetin qalyptastyrý maqsatynda arnaıy jadynamalar, nusqaýlyqtar men gaıdbýktar ázirlenip, balalar men ata-analarǵa taratylatyn bolady. Óńirlerde «Kıeli shyǵys», «Uly Dala keremeti», «Jas galym», «Gastro týrızm», «Qonaqjaı otbasy» syndy biregeı jobalar iske asyrylady, — delingen Oqý-aǵartý mınıstrliginiń habarlamasynda.
Bıyl jyl boıy jumys isteıtin 16 lager, 188 maýsymdyq lager, 10 myńnan astam mektep janyndaǵy lager, onyń ishinde birqatarynda tamaqtandyrý qarastyrylǵan, sondaı-aq 512 shatyrly jáne kıiz úı lagerleri kezeń-kezeńimen ashylady dep josparlanyp otyr.
Aıta ketelik elimizde 10 myńnan astam lager men 512 shatyrly kempıng ashylady.