31 qyzmetkeri bar kompanııa toǵyz qabatty 9 úı salǵan – depýtat

ASTANA. KAZINFORM – Májilis depýtaty Bolatbek Najmetdınuly Premer-mınıstr Oljas Bektenovtiń atyna saýal joldap, kvazımemlekettik satyp alý protsesiniń talaptaryn jasandylyqtan aryltýdy usyndy.

- Qazaqstanda jyl saıyn memlekettik organdarmen birge kvazımemlekettik kompanııalar, jer qoınaýyn paıdalanýshylar retteletin satyp alý sharalaryn uıymdastyrady. Olardyń jıyntyq kólemi 30 trln teńgege deıin jetedi. Alaıda shynaıy kórinis salmaqty suraqtar týǵyzady. Mysaly, resmı túrde 31 qyzmetkeri ǵana bar bir kompanııa turǵyn úı satyp alý baǵdarlamasy boıynsha 495 páterdi qoldanysqa bergen. Bul toǵyz qabatty toǵyz úı degen sóz. Al ondaı qurylysty keminde 700 adam salýy múmkin. Kompanııanyń shtattaǵy jumysshylarynyń sany budan 20 ese az, - deıdi depýtat.

Onyń sózinshe, dál osyndaı sáıkessizdikter búkil respýblıka aýmaǵynda bolyp jatyr.

- Mundaı kompanııalar memlekettik, kvazımemlekettik jobalarǵa jappaı qatysyp, ondaǵan, tipti júzdegen mıllıard teńgeniń memlekettik tapsyrysyna benefıtsıar bolyp otyr. Jumys kúshi de, óndiris qýaty da joq bolǵanyna qaramastan, áleýmettik nysandardy, mektepter men aýrýhanalardy, ınfraqurylym men turǵyn úıdi qatar sala beredi. Osylaısha naqty jumystyń kóbi beıresmı tásilmen, «kóleńkeli jolmen», salyq pen áleýmettik aýdarymdar tólemeıtin gastarbaıterlerdiń, esepke alynbaǵan jumysshylardyń kúshimen isteledi, - deıdi Bolatbek Najmetdınuly.

Májilis depýtaty mundaı tendentsııa memleketti qyrýar salyqtan qaǵyp qana qoımaı, eldegi jumyssyzdyqty ýshyqtyryp jatyr.

- Beıindi mınıstrlikter satyp alý erejelerine eńbekaqy tóleý qory men salyq, áleýmettik aýdarym boıynsha qoıylatyn eń tómengi mindetti talaptardy engizý kerek. Іri memlekettik ınvestıtsııalyq jobalarǵa shtat sany óte az kompanııalardyń qatysý faktileri boıynsha tekserý júrgizý qajet, - delingen depýtattyq saýalda.

Eske salsaq, Májilistiń taǵy bir depýtaty Azat Perýashev «Samuryq-Qazyna» qory memleketten 1,25 trln teńge tabysyn jasyryp qalǵanyn málim etken bolatyn.