Qyrkúıektiń sońyna deıin 50 baǵyttaǵy 124 poıyzǵa Starlink ınternet júıesi ornatylady
ASTANA. KAZINFORM- 2026 jylǵy 8 qyrkúıektegi jaǵdaı boıynsha Qazaqstanda Starlink spýtnıktik ınterneti 31 baǵytta qatynaıtyn 59 poıyz quramynda qoljetimdi. Bul 770-ten astam vagon, dep habarlaıdy QR Kólik mınıstrligi.
Qyrkúıek aıynyń sońyna deıin 50 baǵyttaǵy 124 poıyz quramyn, ıaǵnı 1 235 vagondy spýtnıktik ınternetpen jabdyqtaý josparlanyp otyr.
Aıta keteıik, Qazaqstanda jolaýshylar poıyzdaryn spýtnıktik ınternetpen jabdyqtaý boıynsha aýqymdy jumystar júrip jatyr. Joba Memleket basshysynyń tsıfrlyq ınfraqurylymdy damytý, zamanaýı tehnologııalardy engizý jáne jolaýshylar tasymalynyń sapasyn arttyrý jónindegi tapsyrmalary aıasynda júzege asyrylý ústinde.
Tómen orbıtaly OneWeb jáne Starlink spýtnıktik júıelerin paıdalaný boıynsha alǵashqy synaq jobalary 2025 jyly Astana – Almaty, Astana – Óskemen, Astana – Býrabaı, Astana – Semeı jáne Almaty – Mańǵyshlaq baǵyttarynda júzege asyryldy. 2026 jyly joba keń kólemde iske asyrý kezeńine ótti.
-Qazir spýtnıktik ınternet jolaýshylar kóp qatynaıtyn birqatar baǵytta qoljetimdi. Atap aıtqanda, Nurly jol – Almaty, Nurly jol – Óskemen, Nurly jol – Oral, Nurly jol – Petropavl, Almaty-2 – Óskemen, Qyzylorda – Semeı, Aqtóbe – Almaty-1, Mańǵystaý – Aqtóbe, Oral – Mańǵystaý, Aqtóbe – Qazaly, Aqtóbe – Atyraý jáne Pavlodar – Almaty baǵyttarynda ınternetke qosylýǵa bolady,-delingen habarlamada.
Sondaı-aq onda spýtnıktik ınternettiń engizilýi jolaýshylarǵa kórsetiletin qyzmet sapasy men sapar jaılylyǵyn arttyrýǵa, sondaı-aq poıyzdarda zamanaýı tsıfrlyq orta qalyptastyrýǵa múmkindik beretini aıtylǵan.
Endi poıyzdaǵy ýaqytty tek jol júrýge jumsaý mindetti emes. Jolaýshy sapar barysynda jaqyndarymen baılanysyp, jumys máselelerin sheshe alady, onlaın oqı alady, memlekettik jáne banktik qyzmetterdi paıdalanyp, qajetti ınternet servısterine qol jetkize alady.
Spýtnıktik baılanys arnasy arqyly ınternetke qosylý jyldamdyǵy sekýndyna 100 Mbıtke deıin jetedi. Tómen orbıtaly spýtnıktik tehnologııany paıdalaný temirjol jelisiniń shalǵaı ýchaskelerinde de ınternetke qosylýǵa múmkindik beredi. Mundaı aýmaqtarda dástúrli jerústi baılanys jelileriniń qamtý aımaǵy shekteýli.
Jolaýshylarǵa ınternetti paıdalanýdyń tegin bazalyq paketi usynylady. Onyń aıasynda WhatsApp jáne Telegram messendjerleri arqyly mátindik habarlamalar almasýǵa qosymsha aqy alynbaıdy. Al ınternettegi basqa da servısterdi keńinen paıdalanyp, trafık kólemin ulǵaıtqysy keletin jolaýshylarǵa qosymsha tarıftik paketter usynylǵan.
Spýtnıktik ınternettiń engizilýi poıyzdarda mýltımedııalyq, aqparattyq jáne ózge de tsıfrlyq servısterdi damytýǵa múmkindik beretin tehnologııalyq negiz qalyptastyrady.
Osyǵan deıin Qazaqstanda Starlink Direct to Cell spýtnıktik baılanys tehnologııasy synaqtan sátti ótkeni týraly jazdyq.
