31 arnadan kórsetiletin «Talant shoý» jobasy jańa formatta shyǵaryldy
ALMATY. 24 aqpan. QazAqparat /Ádilet Musahaev/ - «31 arnanyń» eń qyzyqty, halyqtyq jobasy ekinshi maýsymyn efırge jańa formatta shyǵardy.
Ónerimen talaılardy tańǵaldyrǵan tarlandar men erekshe daryn ıeleri, fenomender men výnderkındter, jetkinshekter men eresekter - elimizdiń barlyq talanttary «31 arnanyń» eń qyzyqty, halyqtyq jobasynda. Telekórermenderdiń juldyzdy sáti týyp otyr, 7-aqpannan bastap «Talant shoý» baǵdarlamasynyń jańa maýsymyndaǵy jańa qaharmandar óz ónerin talǵamy zor kórermenge pash etýde.
Bıylǵy jyly baıqaýda baǵyn synaýǵa nıet bildirgen úmitkerlerdiń sany uıymdastyrýshylardyń kútkeninen de asyp túsken. Olar Qazaqstannyń túkpir- túkpirinen qońyraý shalyp, beınetaspalaryn jibergen. Úkili úmitterin arqalap kelgenderdiń jalpy sany 1000-nan asqan. Baıqaýdyń bastapqy irikteý kezeńinen ótken ónerpazdar birinshi kezeńge joldama aldy. Olar án salyp, bı bılep, óner juldyzdaryna parodııa jasap, shyny men úshkir shegeniń ústimen júrip, tipti jalyndaǵan otty da baǵyndyryp, erekshe darynymen túsirý alańynda-aq talaıdy tańdaı qaqtyrǵan. Al, talanttardyń talpynysyn tarazylaǵan ádilqazylardyń sheshimimen júzden júırik, myńnan tulpar atanǵandar kelesi kezeńge ótkizildi.
Esterińizge sala ketsek, baıqaýdyń birinshi maýsymynda qatysýshylar arasyndaǵy eń úzdikteri kórermenderdiń sms hattary arqyly anyqtalǵan bolatyn. Al, jańa maýsymnyń bir ereksheligi - úmitkerler sońǵy kezeńge ótý úshin aldymen Jeńis Ysqaqova, Jolbarys Seıfýllın, Nurlan Abdýllın jáne Sáken Maıǵazıev sekildi sahna sańlaqtarynyń synynan ótýi tıis. Qazylardyń uıǵarymy boıynsha eń tómengi upaı jınaǵan ónerpazdyń baıqaýdaǵy kelesi taǵdyryn kórermenniń sms arqyly jibergen daýysy sheshedi.
