–30°S aıazda da tıimdi: Astanada kóktaıǵaqqa qarsy jańa reagent qoldanylmaq
ASTANA. KAZINFORM — «Astana Tazalyq» kásiporny magnıı negizindegi qaýipsiz reagentterdi qoldanýdy bastady. Olar 0-den -30°C-qa deıingi temperatýrada kóktaıǵaq pen qarǵa qarsy jaqsy áser etedi.
Astana qysy — qalyń qarly, ekpindi jeldi, synaǵy kóp erekshe kezeń. Osyndaı ýaqytta qala tirshiliginiń toqtaýsyz jumys isteýi tikeleı kommýnaldyq qyzmetterdiń kásibı sheberligi men tehnıkalyq daıyndyǵyna baılanysty. Sondyqtan kásiporyn basshylyǵy bıylǵy maýsymǵa qandaı naqty sharalar qabyldanǵanyn ashyq túrde baıandap berdi.
«Astana Tazalyq» JShS bas dırektory Zamır Sagınov, kún saıyn qala kósheleriniń tazalyǵyn qamtamasyz etip júrgen eńbek adamdarynyń eńbegi aıryqsha qurmetke laıyq ekenin atap ótti. Onyń aıtýynsha, qysqy kezeńde eń basty mindet — arnaıy tehnıkanyń úzdiksiz ári qaýipsiz jumysyn qamtamasyz etý.
Bıyl «Astana Tazalyq» kásiporny óz avtoparkin aýqymdy túrde jańartty. Qystyń aýyr júktemesine tótep berýge baǵyttalǵan jańa tehnıkalar qatarynda:
— 5 avtogreıder
— 10 samosval
— 1 kran-manıpýlıator
— 5 vakýýmdy sorý-qoqys jınaý mashınalary (jol pylesostary)
— 8 KDM Volvo kópfýnktsıonaldy jol mashınalary
— 5 KDM CJS
— Reagent daıyndaýǵa arnalǵan 2 arnaıy qondyrǵy
— 4 lapalyq SMP tıpindegi júktegish.
Jyl sońyna deıin taǵy birneshe tehnıka jetkiziledi dep kútilip otyr.
Osy qysta kásiporyn magnıı negizindegi ekologııalyq taza otandyq reagentterdi qoldanady.
— Olardyń qatarynda jeke materıal retinde de, arnaıy qospalardyń quramynda da qoldanylatyn magnıı hlorıdi (bıshofıt) bar. Mundaı reagentter korrozııany azaıtyp, óńdeý tıimdiligin arttyrýǵa múmkindik beredi. Olar 0-den -30°C-qa deıingi temperatýrada kóktaıǵaq pen qarǵa qarsy jaqsy áser beredi, al keıbir formýlalar budan da tómen aıazda tıimdi jumys isteıdi. Eń basty artyqshylyǵy — bul reagentterdiń sertıfıkattalǵan, qaýipsiz jáne qorshaǵan ortaǵa zııan keltirmeıtindigi. Bul faktor megapolıs jaǵdaıynda erekshe mańyzdy, — dedi mekeme mamandary.
Osyǵan deıin elorda kóshelerin tazalaý jáne kútip-ustaý jumystary kúsheıtilgen rejımde júrgizilip jatqanyn jazǵan edik. «Astana Tazalyq» mekemesiniń qoımalarynda 1 200 m³-den asa qum, 4 400 tonna kóktaıǵaqqa qarsy qospalar jáne 1 000 tonna reagent saqtaýly.
Sonymen qatar Astanada «Tsıfrlyq jol qaǵazy» júıesi iske qosylǵany belgili boldy. Endi Astana kóshelerine shyqqan ár tehnıka qandaı baǵytta júr, qandaı kólemde reagent shashty, qaı ýaqytta jumys bastady — bárin naqty ýaqyt rejıminde kórsetetin bolady.